Ibiciro by’agakingirizo ku isi hose bigiye kuzamuka ku kigero gishobora kugera kuri 30%, bitewe n’ingaruka z’intambara iri kubera muri Iran ku masoko mpuzamahanga.
Ibi byatangajwe na sosiyete Karex Berhad, ari na yo ikora agakingirizo kenshi kurusha izindi ku isi.
Iyi sosiyete ivuga ko ihungabana ryatewe n’iyo ntambara ryazamuye ibiciro by’ibikoresho fatizo n’ubwikorezi ku buryo kongera ibiciro bitakwirindwa.
Karex ikora agakingirizo karenga miliyari eshanu buri mwaka, ikorana n’ibirango bikomeye nka Durex na Trojan.
Uretse ubucuruzi, inatanga umusanzu mu buzima rusange, ikageza ibicuruzwa byayo ku nzego zirimo urwego rw’ubuzima rwa National Health Service ndetse no muri gahunda z’inkunga zishyigikiwe na United Nations ku isi hose.
Umuyobozi mukuru wayo, Goh Miah, yatangaje ko iyi ntambara yatangiye gukaza umurego mu mpera za Gashyantare, ikaba yarazamuye cyane ibiciro by’ibikoresho nk’urubber y’ubukorano, nitrile, aluminiyumu n’amavuta ya silicone.
Yagize ati: “Ibintu biracyari mu gihirahiro, kandi ibiciro biri kuzamuka hose.
Nta kundi twabigenza uretse kubyimurira ku baguzi.”
Si ibyo gusa, kuko n’ubwikorezi bwahungabanye cyane.
Kohereza ibicuruzwa mu Burayi no muri Leta Zunze Ubumwe za Amerika ubu bifata hafi amezi abiri, mu gihe mbere byatwaraga ukwezi kumwe. Ibi byatumye ububiko bw’abaguzi bugabanuka cyane.
Mu gihe kandi hari impungenge ku bijyanye no gutinda kw’ibicuruzwa, abacuruzi benshi bari kwihutira kubika byinshi bishoboka, bituma isoko rikomeza kugira igitutu gikomeye.
Goh Miah yanagaragaje ko ibihugu bikiri mu nzira y’amajyambere ari byo bishobora guhura n’ingaruka zikomeye kurushaho, kubera ububiko buke n’ubushobozi buke bwo kongera kubona ibicuruzwa vuba.
Nubwo bimeze bityo, Karex ivuga ko ifite ububiko buhagije bwo gukomeza gutanga agakingirizo mu mezi ari imbere, kandi iri kongera umusaruro kugira ngo ihuze n’ibikenewe ku isi.
Iyi sosiyete iri mu zindi nganda nyinshi ku isi, zirimo n’izikora ibikoresho byo kwa muganga nk’uturindantoki, zikomeje guhura n’ingaruka z’ihungabana ry’amasoko mpuzamahanga ryatewe n’iyi ntambara.
rwandatribune.rw
