Urukiko rwa gisirikare mu burasirazuba bwa Repubulika Iharanira Demokarasi ya Congo rwakatiye abasirikare 66 igihano cy’urupfu, nyuma yo kubahamya ibyaha birimo ubugwari ku rugamba, kwigomeka no kutubahiriza amabwiriza y’abayobozi babo.
Iki cyemezo cyafashwe nyuma y’urubanza rw’abasirikare 71 rwabereye i Walikale, mu Ntara ya Kivu y’Amajyaruguru. Muri bo, bane bagizwe abere, mu gihe undi umwe yakatiwe igifungo cy’imyaka 10.
Aba basirikare bari barafashwe ku wa 20 Ukwakira 2026, bakekwaho kuva ku birindiro byabo bagahunga imirwano yari ihanganishije ingabo za Leta n’ihuriro ry’inyeshyamba ryitwa Refoundation of the Nation (FRN), ririmo umutwe wa M23.
Ibi bibaye mu gihe igisirikare cya RDC gikomeje kunengwa imikorere n’imitegurire yacyo ku rugamba.
Hari kandi abasirikare bagiye bagaragaza ko bahembwa umushahara muto kandi ko badafite ibikoresho bihagije bibafasha mu mirwano.
Muri Werurwe 2024, RDC yongeye gushyira mu bikorwa igihano cy’urupfu nyuma y’imyaka 20 cyarahagaritswe.
Leta yavuze ko iki gihano kizajya gishyirwa mu bikorwa ku bantu bamwe na bamwe, barimo abo ifata nk’abagambanyi bari mu gisirikare.
Nubwo icyo gihano cyongeye kwemezwa, nta muntu urashyirwa mu bikorwa igihano cy’urupfu kuva icyo gihe.
Imibare yakusanyijwe n’igitangazamakuru cyo mu Bufaransa RFI igaragaza ko kuva mu ntangiriro za 2025, nibura abasirikare 507 bamaze gucirwa imanza, muri bo 381 bakaba barakatiwe igihano cy’urupfu.