Kivu y’Amajyaruguru: Imirwano yongeye kubura mu rukerera rwo kuri uyu wa Gatanu tariki ya 25 Nzeri 2026, mu gace ka Remeka, muri groupement ya Ufamandu ya Mbere, muri Teritwari ya Masisi.
Amakuru Rwandatribune ikesha isoko ryo muri ako gace avuga ko imirwano yatangiye ahagana saa 03:00, nyuma y’igitero cyagabwe n’abarwanyi ba AFC/M23 ku birindiro bya FARDC bifatanyije n’abarwanyi ba Wazalendo.
Umwe mu bayobozi ba Sosiyete Sivile muri ako gace yabwiye Rwandatribune ko Remeka yongeye kugwa mu maboko ya AFC/M23, nyuma y’imirwano ikomeye yabaye kuva mu rukerera.
Uyu muyobozi yavuze kandi ko uduce dukikije Remeka twongeye kugenzurwa na AFC/M23, mu gihe imirwano yakomeje mu bice bimwe na bimwe byo muri Ufamandu ya Mbere.
Ibi bibaye nyuma y’uko FARDC n’abarwanyi ba Wazalendo bari bongeye kwigarurira Remeka n’utundi duce two muri aka gace hagati muri Nzeri. Ku wa 15 Nzeri, FARDC yatangaje ko yisubije Miko na Remeka, ndetse nyuma yaho hakurikiraho ibitero byaganishaga ku bindi bice birimo Katuunda, Miano, Kaleta na Kasake.
Radio Okapi yari yatangaje ku wa 22 Nzeri ko ibintu byari bikomeje kuba bibi ku murongo wa Remeka–Ngungu, aho AFC/M23 yavugwaga mu bitero ku birindiro FARDC na Wazalendo bari bamaze kwigarurira.
Ku wa Gatanu tariki ya 25 Nzeri, andi makuru yigenga yemeje ko imirwano yongeye kubura i Remeka, avuga ko AFC/M23 yari yongereye abarwanyi n’ibikoresho bivuye i Ngungu mbere yo kugaba igitero ku birindiro bya FARDC na Wazalendo.
FARDC ishinja M23 kwica agahenge
Mu kiganiro yagiranye n’itangazamakuru Lt Reagan Kalonji Mbuyu yavuze ko umutwe wa M23 warenze ku masezerano y’agahenge ndetse ukongera kugaba ibitero ku birindiro by’ingabo za Leta n’abafatanyabikorwa babo.
Ku ruhande rwayo, AFC/M23 nayo yakunze gushinja ingabo za FARDC n’abarwanyi bafatanya na zo kugaba ibitero ku birindiro byayo. Ibi birego by’impande zombi bikunze gutangwa mu gihe imirwano ikomeje, kandi bimwe muri byo ntibihita bibonerwa gihamya yigenga.
Mwizerwa Ally
Rwandatribune.rw
