Ishyaka Union pour la Démocratie et le Progrès Social (UDPS) riri ku butegetsi muri Repubulika Iharanira Demokarasi ya Congo (RDC) ryatangaje ko umwe mu bayobozi baryo i Butembo, muri Kivu y’Amajyaruguru, yapfuye nyuma yo gukubitwa n’abaturage.
UDPS yavuze ko Karondwa Mwanaweka Marie-Célestin Bytaty, wari umuyobozi w’agateganyo w’ishyaka i Butembo, yakubiswe ku wa 28 Nzeri 2026 nyuma yo kuva kuri radiyo aho yari yagiye gutanga ubutumwa bwo gukangurira abaturage kwirinda Ebola.
Ishyaka rivuga ko bamwe mu baturage batishimiye ubutumwa yatangaga kuri radiyo, cyane cyane ubwo yabasabaga gufata ingamba zo kwirinda icyorezo cyongeye kugaragara muri uyu mujyi. Ni muri urwo rwego ngo yaje gutabwaho n’abantu bamukubita.
UDPS kandi yatangaje ko nyuma y’iki gikorwa, inzu n’indi mitungo ya Karondwa Mwanaweka byatwitswe.
Ibi bibaye mu gihe RDC ihanganye n’icyorezo cya Ebola yo mu bwoko bwa Bundibugyo, cyakomeje gukwirakwira mu gihugu.
Imibare yatangajwe na Minisiteri y’Ubuzima ivuga ko kuva muri Gicurasi 2026 kugeza ku wa 26 Nzeri, abantu 8,067 bari bamaze kwandura Ebola, mu gihe abagera ku 3,901 bari bamaze gupfa.
Inzego z’ubuzima zivuga ko imyumvire y’abaturage bamwe idaha agaciro Ebola iri mu bikomeje kugora ibikorwa byo kuyirwanya.
Hari abanga kwemera ko iki cyorezo gihari cyangwa ko gishobora guhitana abantu, bigatuma abarwaye bamwe batamenyesha inzego z’ubuzima kandi bakaguma mu ngo, bityo bakaba bakomeza kwanduza abandi.
Inzego z’ubuzima kandi zivuga ko kuba nta muti cyangwa urukingo bihari kuri ubu bwoko bwa Ebola ari imwe mu mbogamizi zikomeye mu guhangana n’iki cyorezo.
Rwandatribune.rw
