Mu gihe Afurika y’Epfo yitegura kwizihiza Freedom Day, impungenge ni zose ku mutekano w’abanyamahanga, cyane cyane Abanyekongo, nyuma y’imyigaragambyo imaze iminsi igaragaza uburakari ibibasira.
Ambasade ya Repubulika Iharanira Demokarasi ya Congo (RDC) muri Afurika y’Epfo yasabye Abanyekongo bose bahatuye gukaza umutekano no kwitwararika cyane, nyuma y’uko mu bice bitandukanye by’iki gihugu hagaragaye imyigaragambyo igamije abanyamahanga.
Mu itangazo ryashyizwe ahagaragara ku wa 25 Mata 2026, iyi Ambasade yagaragaje ko ibikorwa by’urugomo byibasiye abanyamahanga byatangiye kugaragara mu ntara zirimo KwaZulu-Natal, Western Cape ndetse no mu mijyi imwe n’imwe ikomeye.
Amakuru yatanzwe n’iyi Ambasade agaragaza ko hagati ya tariki ya 27 na 29 Mata 2026, mu ntara ya Gauteng hashobora kubera indi myigaragambyo ikomeye, ihurirana n’ibirori byo kwizihiza Freedom Day.
Ambasade yihanangirije ko iyo myigaragambyo ishobora kuvamo umutekano muke, harimo n’ibikorwa by’urugomo bishobora kwibasira abaturage, cyane cyane abanyamahanga.
Mu rwego rwo kwirinda ingaruka z’ibi bikorwa, Abanyekongo basabwe:
Kwirinda ahari imbaga y’abantu benshi n’ahashobora guteza ibyago;
Kutivanga n’abigaragambya cyangwa kubegera, kugabanya ingendo zitari ngombwa, gukurikirana amakuru yizewe atangwa n’inzego zibishinzwe, kongera ingamba z’umutekano aho batuye n’aho bakorera.
Abacuruzi n’abashoramari b’Abanyekongo na bo basabwe guhindura amasaha y’akazi cyangwa bagahagarika ibikorwa byabo by’agateganyo mu minsi ishobora kuba irimo ibyago, mu rwego rwo kurinda ubuzima n’imitungo yabo.
Ambasade irizeza ubufasha bukomeje
Ambasade ya RDC yatangaje ko iri gukorana bya hafi n’inzego z’umutekano za Afurika y’Epfo, hagamijwe gukomeza kurinda Abanyekongo batuye muri iki gihugu.
Mu gusoza, Ambasade yasabye abaturage bose gutuza, kwitwara neza no kubahiriza amategeko y’igihugu barimo, birinda icyateza ibibazo mu bihe nk’ibi bikomeye.
rwandatribune.rw
