Minisitiri w’Uburinganire n’Iterambere ry’Umuryango, Uwimana Consolée, yashimiye abagore bakorera muri Polisi y’Igihugu kubera uruhare rwabo mu kubungabunga umutekano no guteza imbere umwuga wa polisi, abasaba gukomeza kuba icyitegererezo ku bakobwa n’abagore bifuza kwinjira muri uru rwego.
Yabitangaje kuri uyu wa Kabiri ubwo yitabiraga inama y’iminsi ibiri ihuza abakobwa n’abagore bakorera mu mashami atandukanye ya Rwanda National Police, ibaye ku nshuro ya 14. Iyi nama igamije kungurana ibitekerezo ku buryo abagore barushaho kugira uruhare mu bikorwa bya polisi no mu gucunga umutekano w’abaturage.
Mu ijambo rye, Minisitiri Uwimana yavuze ko abapolisikazi batagomba kurebwa gusa nk’abubahiriza amategeko, ahubwo ko ari abantu bafite uruhare rukomeye mu kubaka icyizere hagati y’abaturage n’inzego z’umutekano.
Yagize ati: “Ndashima buri mupolisikazi wambaye uyu mwambaro uyu munsi. Ntimuri abagenzura iyubahirizwa ry’amategeko gusa, ahubwo muri icyitegererezo ku bari inyuma yanyu. Abagore bari muri uyu mwuga ntibubahiriza amategeko gusa, ahubwo bagira imbaraga n’ubushobozi byihariye mu guhuza abaturage n’inzego zishinzwe kubahiriza amategeko.”
Yongeyeho ko ubwitange, ubunyamwuga n’indangagaciro biranga abapolisikazi bikwiye gukomeza kuba inkingi ikomeye mu rwego rwo guteza imbere umutekano n’iterambere ry’igihugu.
Mu myaka ishize, u Rwanda rwashyize imbaraga mu kongera umubare w’abagore mu nzego zifata ibyemezo no mu nzego z’umutekano.
Abapolisikazi b’Abanyarwanda bakomeje kwitwara neza haba mu kazi ka buri munsi imbere mu gihugu ndetse no mu butumwa bw’amahoro bw’Umuryango w’Abibumbye mu bihugu bitandukanye.
Abasesenguzi bavuga ko uruhare rw’abagore mu bikorwa bya polisi rwagize akamaro gakomeye mu kurushaho kwegera abaturage, gukemura amakimbirane mu mahoro no kongera icyizere abaturage bagirira inzego z’umutekano.
Iyi nama kandi yabaye umwanya wo kuganira ku mbogamizi abagore bahura na zo mu kazi ka polisi, uburyo bwo kuzitsinda ndetse no gushimangira ubufatanye hagati y’abapolisikazi bakorera mu nzego zitandukanye.
Ubutumwa bwa Minisitiri Uwimana Consolée bwongeye kugaragaza ko abagore bafite uruhare rudasanzwe mu kubaka umutekano n’iterambere ry’igihugu.
Mu gihe u Rwanda rukomeje guteza imbere ihame ry’uburinganire, abapolisikazi basabwe gukomeza kurangwa n’ubunyamwuga, ubwitange n’indangagaciro zibagira icyitegererezo ku rubyiruko n’abagore bifuza gukorera igihugu mu nzego z’umutekano.
Rwarinda Gaston
rwandatrubune.rw
