Umukozi w’umuryango mpuzamahanga utabara imbabare, Médecins Sans Frontières (MSF), yanduye virusi ya Ebola yo mu bwoko bwa Bundibugyo, mu gihe uyu muryango ukomeje ibikorwa byo guhangana n’icyorezo gikomeye cyibasiye Repubulika Iharanira Demokarasi ya Congo.
MSF yatangaje ko uwo mukozi yari mu bakozi bari bahugiye mu bikorwa byo kurwanya Ebola muri RDC, ariko ntiyatangaza umwirondoro we cyangwa amakuru arambuye ku buzima bwe, mu rwego rwo kubahiriza ubuzima bwite bw’umurwayi.
Uyu mukozi ari kwimurwa mu buryo bwubahiriza amabwiriza akomeye y’ubuvuzi, kugira ngo ajyanwe mu bitaro byabugenewe mu Buholandi, aho azakomeza kuvurirwa no gukurikiranwa n’abaganga.
MSF yavuze ko nubwo abakozi bayo bahabwa amahugurwa ndetse bagakoresha ibikoresho bikomeye bibarinda kwandura, gukora ku murongo w’imbere mu guhangana na Ebola bituma badashobora gukuraho burundu ibyago byo guhura na virusi.
Uyu muryango watangaje ko kuva muri Gicurasi 2026, RDC imaze gutangaza abarenga 8,000 banduye Ebola ndetse n’abagera ku 4,000 bapfuye, ariko ukavuga ko umubare nyawo ushobora kuba urenze uwo, bitewe n’ahari ibibazo mu gukurikirana no kumenya abarwayi bose.
MSF ikomeje ibikorwa byo kurwanya iki cyorezo mu Ntara zirimo Ituri, Kivu y’Amajyaruguru, Tshopo na Haut-Uélé, ifatanyije n’inzego z’ubuzima za RDC ndetse n’abaturage bo mu duce twibasiwe.
Kwandura k’umukozi wa MSF bibaye mu gihe ibikorwa byo kurwanya Ebola bihanganye n’ikindi kibazo cy’umutekano, cyane cyane mu bice by’Iburasirazuba bwa RDC aho imirwano n’ubuhunzi bikomeje gutuma ibikorwa by’ubuvuzi bigorana.
Umuryango w’Abibumbye na wo watangaje ko ikigo cy’ingenzi cyakirirwagamo abantu bakekwaho Ebola muri Kigonze, muri Ituri, cyahiye, bikaba byaragoye kurushaho ibikorwa byo kwakira no gukurikirana abantu bashobora kuba baranduye.
Rwandatribune.rw
