Ihuriro AFC/M23 ritangaza ko ryatangiye gahunda yihariye yo guhugura abayobozi bo mu nzego zitandukanye, igamije kubaka Repubulika Iharanira Demokarasi ya Congo (RDC) irangwa n’imiyoborere myiza, ituze n’imibereho idashingiye ku bugizi bwa nabi, amacakubiri no kunyereza umutungo w’igihugu.
Amahugurwa ya mbere yiswe “Uongozi Bora”
Mu cyiciro cya mbere cy’aya mahugurwa cyiswe “Uongozi Bora”, AFC/M23 yahuguye abayobozi 395 bakorera mu bice igenzura. Aya mahugurwa yabereye mu kigo cy’amahugurwa cya Kanombe, giherereye muri teritwari ya Rutshuru.
AFC/M23 ivuga ko iyi gahunda igamije gufasha abayobozi kurushaho gusobanukirwa inshingano zabo, guhindura imikorere iganisha ku miyoborere inoze, ndetse no kubaka umuco w’ubwumvikane n’amahoro hagati y’abaturage.
Ibyagarutsweho n’ubuyobozi bwa AFC/M23
Umuvugizi w’iri huriro, Lawrence Kanyuka, yavuze ko abitabiriye aya mahugurwa bahawe ubumenyi buzabafasha kwirinda imikorere mibi yagiye igira ingaruka ku miyoborere ya RDC, harimo ruswa, amakimbirane n’imiyoborere idahwitse.
Yagize ati: “Twifuza abayobozi bashyira imbere amahoro, ubumwe bw’abaturage no kubaka inzego zikomeye zifasha igihugu gutera imbere”.
Gusoza amahugurwa n’ubutumwa bwa Gen Maj Makenga
Umuhango wo gusoza iki cyiciro wabaye ku wa 23 Mata, witabirwa n’abayobozi bakuru ba AFC/M23 barimo Umugaba Mukuru wa M23, Gen Maj Sultani Makenga.
Mu ijambo rye, Gen Maj Makenga yasabye abitabiriye aya mahugurwa gushyira mu bikorwa ibyo bigishijwe, agaragaza ko abayobozi bakiri bato bafite uruhare rukomeye mu hazaza h’igihugu.
Yagize ati: “Ntibikiri imvugo, ahubwo ni ibikorwa bifatika bifitiye abaturage akamaro”.
Icyerekezo cya AFC/M23
AFC/M23 ivuga ko igamije kugira uruhare rukomeye mu miyoborere ya RDC mu gihe intambara yaba irangiye, aho iteganya ko bamwe mu barwanyi bayo n’abayobozi bazinjira mu nzego za politiki n’iz’umutekano.
Iri huriro rikomeza gushimangira ko rifite icyerekezo cyo kubaka RDC nshya irangwa n’umutekano, iterambere n’imiyoborere ishingiye ku bumwe bw’abaturage, itandukanye n’igihe cyashize cyaranzwe n’umutekano muke, ubukene n’amacakubiri.
rwandatribune.rw
