Umusirikare umwe wo mu mutwe ushinzwe kurinda ingoro ya Perezida w’u Burundi i Bubanza yakomeretse nyuma yo kurasana na mugenzi we mu ijoro ryabanjirije ku wa 3 Nzeri 2026.
Amasasu yumvikanye ahagana saa sita z’ijoro, nyuma y’amakimbirane yavukiye hagati y’abasirikare babiri bari bashinzwe umutekano w’ingoro.
Amakuru yatangajwe na SOS Médias Burundi avuga ko amakimbirane yatangiye ubwo umuyobozi w’abarinzi b’ingoro yageraga ku kazi atinze.
Impaka hagati ye n’umusirikare mugenzi we wari uri ku kazi ngo zarakomeye, bituma ibintu birushaho kuba bibi.
Bivugwa ko nyuma y’izo mpaka, uwo muyobozi yafashe imbunda akagaruka aho mugenzi we yari ari, maze akamurasaho ariko ntamukomeretse.
Uwo musirikare na we yahise amusubiza amasasu, amukomeretsa mu kibero.
Iryo raswa ryateje ubwoba mu baturage bo mu Mujyi wa Bubanza, kuko urusaku rw’amasasu rwumvikanye mu bice bitandukanye by’umujyi.
Bamwe mu baturage ngo bakekaga ko amasasu yavugiye hafi ya gereza ya Bubanza, aho rimwe na rimwe havugwa amasasu mu gihe habaye ikibazo cy’umutekano.
Nyuma y’iraswa, hari amakuru avuga ko bamwe mu baturage n’abandi bantu bari hafi y’ahabereye incident bafashwe n’abashinzwe umutekano, ndetse bamwe bakaba barahohotewe.
Icyatumye bafatwa n’ibyabaye nyuma yaho ntibyahise bisobanuka.
Umusirikare wakomeretse yajyanywe ku Bitaro bya Bubanza kugira ngo avurwe, mu gihe ingabo n’abashinzwe umutekano bakajije umutekano hafi y’ingoro.
Kugeza ku mugoroba wo ku wa 3 Nzeri, nta tangazo ry’inzego z’u Burundi ryari ryasohoka ritanga ibisobanuro birambuye ku cyateye ayo makimbirane n’iraswa ryabaye hagati y’abo basirikare.
Rwandatribune.rw
