Amakuru y’urupfu rwa Dafroza Gauthier, umwe mu bashinze Ihuriro ry’Imiryango Iharanira Ubutabera ku Rwanda (CPCR), yatangiye gukwirakwira, aho ubutumwa bw’akababaro bugaragaza uruhare yagize mu gukurikirana abakekwaho uruhare muri Jenoside yakorewe Abatutsi mu 1994.
Dafroza Gauthier yari umugore wa Alain Gauthier, bombi bakaba barashinze CPCR mu 2001. Iri huriro ryibanze ku gukurikirana mu nkiko z’u Bufaransa abantu bakekwaho kugira uruhare muri Jenoside yakorewe Abatutsi bari barahungiye muri icyo gihugu.
Urupfu rwa Dafroza ruje nyuma y’imyaka isaga 20 yari amaze muri uru rugendo rwo gushaka ubutabera
Mu kiganiro cyasohotse muri Kamena 2026, Alain Gauthier yavuze ko we na Dafroza bari bamaze gutanga hafi ibirego 40,bishakisha abakoze Jenosid bihishe hirya no hino mu mahanga.
.
Umugore waranzwe no gukurikirana abakekwaho Jenoside
Dafroza Gauthier yari Umunyarwandakazi warokotse Jenoside yakorewe Abatutsi. Mu mwaka wa 2025, Kigali Today yanditse ko yari yarabuze abarenga 80 bo mu muryango we muri Jenoside, ibintu byagize uruhare mu kumutera gukomeza guharanira ko abakekwaho ibyaha bagezwa imbere y’ubutabera.
We n’umugabo we bakunze kugaragazwa nk’abantu bamaze imyaka myinshi bakusanya ubuhamya n’ibimenyetso mu Rwanda, bikifashishwa mu manza zabereye mu Bufaransa.
Bakaba barashinze umuryango ,CPCR uyu muryango uvuga ko intego yawo ari ugushyikiriza ubutabera bw’u Bufaransa abantu bakekwaho uruhare muri Jenoside yakorewe Abatutsi bari barabonye ubuhungiro cyangwa batuye muri icyo gihugu.
CPCR
Imirimo ya CPCR yagejeje ku manza zikomeye
Mu manza zagiye zikurikiranwa hifashishijwe ibikorwa bya CPCR harimo urwa Pascal Simbikangwa, rwabaye urwa mbere mu Bufaransa rurebana n’ibyaha bya Jenoside yakorewe Abatutsi, mu 2014.
Hari kandi izindi manza z’abantu nka Laurent Bucyibaruta, Philippe Hategekimana, Octavien Ngenzi na Tito Barahira, ndetse n’urubanza rwa Dr Eugène Rwamucyo. Mu kiganiro Alain Gauthier yagiranye n’Imvaho Nshya muri Kamena 2026, yavuze ko abantu umunani bari bamaze kuburanishwa no guhamwa n’ibyaha mu manza zifitanye isano n’ibikorwa bya CPCR, mu gihe izindi manza zari zigikomeje.
Mu 2026 kandi, Ubushinjacyaha bw’u Bufaransa bwashimiye ku mugaragaro uruhare rwa CPCR n’abashinze uyu muryango mu gukusanya amakuru n’ubuhamya bwafashije mu gukurikirana bamwe mu bakekwaho uruhare muri Jenoside.
Umurage asize
Alain na Dafroza Gauthier bari barahawe umudali w’ishimwe “Igihango” na Perezida Paul Kagame mu 2017, mu rwego rwo gushimira uruhare rwabo mu guharanira ukuri, kwibuka no kubona ubutabera ku barokotse Jenoside yakorewe Abatutsi.
Urupfu rwa Dafroza rusize amateka y’umugore wari umaze imyaka myinshi aharanira ko ibyaha bikomeye byakozwe mu Rwanda bitibagirana kandi ko abakekwaho kubigiramo uruhare bagezwa imbere y’ubutabera.
