Kigali — 7 Nzeri 2026: Niyonshuti Ben, umusore w’imyaka 27 usanzwe ukora ubucuruzi ndetse akagira uruhare mu bikorwa by’urubyiruko, ni we watsinze amatora y’ibanze yo gutoranya uzahagararira urubyiruko mu Nteko Ishinga Amategeko.
Aya matora yabaye ku wa 2 Nzeri 2026, asimbura Icyitegetse Venuste wari umaze kwegura kuri uwo mwanya.
Komisiyo y’Igihugu y’Amatora yatangaje ko Niyonshuti yabonye amajwi 47 kuri 198 y’abatoye, angana na 23,9%.
Uruhare rwe mu bikorwa by’urubyiruko
Niyonshuti yavukiye kandi atuye mu Karere ka Nyarugenge mu Mujyi wa Kigali.
Afite impamyabumenyi y’icyiciro cya kabiri cya kaminuza mu bijyanye n’imiyoborere y’inzego za Leta n’iz’ibanze, yakuye muri Kaminuza ya Kigali mu 2023.
Mu mashuri yisumbuye yize Ubugenge, Ubutabire n’Ibinyabuzima (PCB).
Yatangiye ibikorwa by’ubukorerabushake mu 2017 akiri mu mashuri yisumbuye.
Umwaka wakurikiyeho, yagizwe umuhuzabikorwa w’Inama y’Igihugu y’Urubyiruko ku rwego rw’Umudugudu wa Ruliba, mu Murenge wa Kigali.
Kuva icyo gihe, yakomeje kugira uruhare mu bikorwa by’urubyiruko, agenda azamuka mu nzego zitandukanye z’Inama y’Igihugu y’Urubyiruko, anagira inshingano mu rubyiruko rw’abakorerabushake ku rwego rw’Akagari n’Umurenge.
Mu 2022, yatowe nk’Umuyobozi wa Komisiyo y’Imibereho Myiza mu ihuriro ry’urubyiruko mu Karere ka Nyarugenge.
Mu Mujyi wa Kigali kandi afite inshingano zo kuyobora ishami ry’urubyiruko muri Komisiyo y’Ubukangurambaga mu Muryango FPR Inkotanyi.
Ubukorerabushake bwamufashije kubona amahirwe
Niyonshuti avuga ko imyaka amaze mu bikorwa by’ubukorerabushake yamuhaye ubunararibonye mu gukorana n’abandi no gukemura ibibazo bitandukanye by’urubyiruko n’abaturage.
Mu gihe cya Covid-19, yayoboye urubyiruko rw’abakorerabushake rwagize uruhare mu gufasha abaturage kubahiriza amabwiriza yo kwirinda icyorezo.
Yanagize uruhare mu bikorwa byo gukurikirana gahunda yo gukingira Covid-19.
Avuga ko nubwo ubukorerabushake ubwabwo butari akazi gahemba, ubumenyi n’imiyoboro y’abantu yabukuyemo byamufashije kubona andi mahirwe y’akazi n’ubucuruzi.
Yatangaje ko hari imishinga y’ubushakashatsi yakoze, ndetse no mu gihe cya Covid-19 akagira ibikorwa byatanze akazi ku rubyiruko rurenga 300.
Kugeza ubu, akomeje gukora mu mishinga itandukanye y’imiryango itegamiye kuri Leta ndetse akagira n’ubucuruzi akora.
Ikoranabuhanga ni imwe mu ntego azageza ku rubyiruko
Niyonshuti avuga ko kuba yarakoranye igihe kirekire n’urubyiruko ari byo byatumye yiyemeza kuruhagararira mu Nteko Ishinga Amategeko.
Mu nshingano ze nshya, avuga ko azibanda ku gufasha urubyiruko kumenya neza imikorere y’Inteko, ariko cyane cyane akazajya ageza ku bayobozi ibibazo n’ibyifuzo by’urubyiruko.
Azanibanda ku buryo urubyiruko rwakoresha ikoranabuhanga n’umuyoboro mugari wa internet mu gushaka amahirwe y’akazi, haba mu Rwanda no hanze yarwo.
Kuri we, kuba u Rwanda rufite internet ihagije bikwiye gufasha urubyiruko kubona imirimo ikorerwa kuri murandasi, aho kumva ko akazi kari mu bihugu byo hanze kadashobora kurugeraho.
Yashimangiye kandi ko hakenewe kongerwa ubumenyi bwunganira ubundi umuntu aba yarize, buzwi nka “soft skills”, kuko bushobora gufasha abarangije amashuri kumenya kwigaragaza, gushaka amahirwe no gukoresha neza ubumenyi bafite.
Ashaka ko urubyiruko ruhabwa ibikorwa birufasha kwiteza imbere
Niyonshuti kandi yavuze ko icyemezo cyo guca inzoga z’ibyuma ari ingenzi, kuko zashoboraga kugira ingaruka zikomeye ku rubyiruko.
Icyakora, asanga kurwanya izo nzoga bikwiye kujyana no kongera ibikorwa bituma urubyiruko rugira aho rumara igihe rukora ibintu bibaka.
Yatanze urugero rw’inzu z’urubyiruko, ibibuga by’imikino n’ibindi bikorwa byafasha urubyiruko kubona aho ruhugira, rukiga ubumenyi bushya cyangwa rukidagadura mu buryo buboneye.
Ku bijyanye n’imyambarire y’urubyiruko, Niyonshuti yavuze ko hakwiye kubaho umurongo usobanutse igihe Leta yaba ifashe icyemezo cyo gushyiraho amabwiriza, kugira ngo abaturage bayamenye kandi bayubahirize.
Niyonshuti Ben ubu ategereje gutangira inshingano zo guhagararira urubyiruko mu Nteko Ishinga Amategeko, nyuma yo gutsinda amatora y’ibanze yari agamije gushaka uzasimbura Icyitegetse Venuste.
Rwandatribune.rw
