Kinshasa – Perezida wa RDC, Félix Tshisekedi, yatangije ku mugaragaro gahunda ya RDC-Pass, uburyo bushya bw’ikoranabuhanga bugamije guha buri Munyekongo umwirondoro wa digitale ushobora kwifashishwa mu kubona serivisi zitandukanye za Leta n’iz’abikorera. Iyo gahunda iri mu murongo wa gahunda ya “RDC 2030 Digital Nation” igamije kwihutisha ihinduramatwara mu ikoranabuhanga muri iki gihugu.
Abayobozi ba Leta bavuga ko RDC-Pass izafasha kugabanya uburiganya bushingiye ku byangombwa, koroshya itangwa rya serivisi za Leta no guha abaturage uburyo bworoshye bwo kwemeza umwirondoro wabo mu rwego rw’imari, itumanaho n’izindi serivisi. Iyi gahunda kandi izashyigikira kwandikisha SIM card hakoreshejwe ibimenyetso by’ibinyabuzima (biometric data) no gukoresha konti imwe mu kubona serivisi nyinshi za Leta.
Ariko nubwo Leta ya Kinshasa iyigaragaza nk’intambwe ikomeye mu kuvugurura imikorere yayo, hari ibibazo byinshi bikomeje kwibazwa. Ese RDC ifite ubushobozi bwo kurinda amakuru bwite y’abaturage bayo? Ese abaturage bo mu bice bya kure aho internet n’amashanyarazi bikiri ikibazo bazabona ayo mahirwe angana n’ay’abatuye mu mijyi minini?
Perezida Tshisekedi yagerageje gukuraho urujijo ruri ku mushinga wa RDC-Pass, asobanura ko atari indangamuntu y’igihugu kandi ko itazasimbura ibyangombwa bisanzwe biteganywa n’amategeko. Ahubwo ngo ni numero ya digitale yihariye izajya ifasha abaturage kubona serivisi za Leta mu buryo bworoshye kandi bwihuse.
Uyu mushinga ufite agaciro kavugwa ka miliyoni zirenga 97 z’amadolari ya Amerika kandi ushyirwa mu bikorwa binyuze mu masezerano y’imyaka 20 hagati ya Leta ya RDC n’ikigo cyo muri Singapore cyitwa Trident Digital Tech. Ibyo byatumye bamwe mu basesenguzi bibaza niba amakuru y’abaturage ba RDC azagenzurwa neza kandi agasigara mu maboko ya Leta aho kugengwa n’abafatanyabikorwa bo hanze.
Ku ruhande rumwe, RDC-Pass ishobora kuba igikoresho gikomeye cyo kuvugurura imitangire ya serivisi no guteza imbere ubukungu bushingiye ku ikoranabuhanga. Ku rundi ruhande, intsinzi yayo izaterwa n’uburyo abaturage bazayitabira, urwego rw’umutekano w’amakuru ndetse n’ubushobozi bwa Leta bwo kuyishyira mu bikorwa ku rwego rw’igihugu cyose.
Ikibazo gikomeye gisigaye ni iki: Ese RDC-Pass izaba urufunguzo rwo kubaka Leta ya digitale igezweho muri RDC, cyangwa izahura n’imbogamizi nk’izagiye zibangamira indi mishinga minini y’ikoranabuhanga muri Afurika?
rwandatribune.rw
