Umunyamakuru wa televiziyo yo muri Leta Zunze Ubumwe za Amerika, Dominique Dillon, ari kuvugisha benshi ku mbuga nkoranyambaga nyuma y’amashusho amugaragaza asinzirira mu gihe yari ari gutangaza amakuru kuri televiziyo.
Nubwo ibi byabaye mu mpera za Nyakanga 2026, ayo mashusho yatangiye gukwirakwira cyane ku wa 5 Kanama 2026, bituma abantu benshi bayatangaho ibitekerezo bitandukanye.
Dillon yari ari mu kiganiro cya mu gitondo cyitwa “Good Morning Memphis” gitambuka kuri FOX13 Memphis, ubwo yafashwaga n’agatotsi mu buryo butunguranye kandi camera ziri kumwereka imbonankubone.
Mu mashusho yakwirakwijwe, uyu munyamakuru agaragara asa n’uwasinziriye akanya gato, nyuma aza guhita ashiguka aseka, ndetse yikubita ku kuboko nk’ushaka kwireba niba ibyo bibaye koko ari ukuri. Nyuma yaje kwemera ko yari yafashwe n’agatotsi mu gihe amakuru yakomezaga gutambuka.
Mu kiganiro yagiranye na Craig Melvin na Laura Jarrett muri gahunda ya TODAY, Dillon yavuze ko ibyabaye byamukojeje isoni, ariko ko yashimishijwe n’uburyo abantu benshi babimwakiranye impuhwe aho kumunenga.
Yagize ati: “Nakangutse mbona basubijeho amashusho yanjye, mpita nibaza nti ‘Mana yanjye, ibi koko birambayeho?’”
Dillon yasobanuye ko icyo gihe yari amaze ijoro ridahagije asinziriye, kubera ko umwana we w’amezi umunani yari afite ikibazo cyo kutaryama neza bitewe no kumera amenyo.
Yavuze ko yagerageje kuryamisha abana be nijoro ariko uwo mwana akomeza kurira, kandi n’ubwo yamuhaye imiti isanzwe ifasha abana muri icyo gihe, ntibyatanze umusaruro. Byatumye asigarana amasaha make cyane yo kuruhuka mbere yo kubyuka ajya ku kazi kare mu gitondo.
Nubwo ibi byamubayeho mu kazi imbere y’abarebaga televiziyo benshi, abantu benshi ku mbuga nkoranyambaga bagaragaje ko bamushyigikiye.
By’umwihariko, ababyeyi bafite abana bato bavuze ko basobanukiwe neza uko kubura ibitotsi no gukora akazi ushonje ibitotsi bishobora gutera umunaniro ukabije.
Bamwe mu bakoresha imbuga nkoranyambaga bavuze ko ibyabaye kuri Dillon ari ikimenyetso cy’uko n’abanyamakuru bakora imbonankubone ari abantu basanzwe bahura n’ibibazo byo mu buzima bwa buri munsi, cyane cyane ibijyanye no kurera abana bato no kubura umwanya uhagije wo kuruhuka.
Rwandatribune.rw
