Amakuru yatangajwe n’ikinyamakuru The Washington Post avuga ko Perezida wa Leta Zunze Ubumwe za Amerika, Donald Trump, yaba yarakuwe muri Turikiya mu buryo bw’ibanga akoresheje indi ndege ya gisirikare, kubera impungenge z’umutekano zaturukaga ku makuru yavugaga ko Iran ishobora kuba yarateganyaga kumugirira nabi.
Ibi bivugwa ko byabaye mu kwezi gushize ubwo Trump yari amaze kwitabira inama ya NATO yabereye muri Turikiya.
Nubwo White House yari yatangaje ko yasubiye muri Amerika akoresheje indege ya Perezida izwi nka Air Force One, amakuru mashya agaragaza ko hashyizweho uburyo bwihariye bwo guhisha indege yari arimo.
Nk’uko The Washington Post ibivuga, inzego zishinzwe kurinda Perezida wa Amerika zafashe ingamba zidasanzwe zo kumucungira umutekano, zirimo guhindura indege yagombaga kumutwara no gutegura urugendo mu buryo butari bumenyerewe.
Icyo gikorwa cyari kigamije gutuma bitamenyekana aho Trump aherereye ndetse n’indege yakoresheje ava muri Turikiya.
Ikinyamakuru kivuga ko izo ngamba zashingiye ku makuru y’ubutasi yavugaga ko hashobora kuba hari umugambi wa Iran wo kugirira nabi Trump.
Nubwo nta rwego rwa Amerika cyangwa rwa Iran rwari rwahise rugira icyo rubivugaho, ayo makuru ngo yafatwaga nk’akomeye ku buryo byasabye ko habaho uburyo budasanzwe bwo kumurinda.
Niba ayo makuru ari ukuri, byaba bisobanuye ko ibyatangajwe mbere na White House ku rugendo rwa Trump bitari bihuye n’uburyo rwakozwemo mu by’ukuri.
Mu gihe abaturage bari bazi ko Perezida yasubiye muri Amerika muri Air Force One, amakuru yaje kujya ahagaragara nyuma agaragaza ko yakoresheje indi ndege ya gisirikare kugira ngo umutekano we urusheho kurindwa.
Uru rugendo rwateguwe mu ibanga rukomeje kuvugisha benshi, cyane cyane ku bijyanye n’uburyo abayobozi bakuru b’ibihugu bikomeye bashobora kurindwa igihe hari amakuru y’iterabwoba ashobora gushyira ubuzima bwabo mu kaga.
Rwandatribune.rw
