Ingabo za Danimarike zohereje bwa mbere itsinda ry’abasirikare bashya batojwe mu ntambara, bazwi nka conscripts, muri Greenland, mu rwego rwo kurushaho gukaza umutekano w’aka gace ko mu Majyaruguru.
Ingabo za Danimarike zatangaje ko aba basirikare bazitabira ku nshuro ya mbere ibikorwa bya gisirikare mu rwego rwa Operation Arctic Endurance, mu gihe bazakomeza imyitozo no kongera ubumenyi n’ubushobozi mu bya gisirikare.
Ni ubwa mbere itsinda ry’abasirikare binjiye mu gisirikare ku gahato cyangwa binyuze muri gahunda y’itangwa ry’abasirikare rihabwa inshingano muri Greenland.
Aba basirikare bagabanyijwe mu byicaro bibiri: bamwe boherejwe i Kangerlussuaq, abandi bashyirwa i Nuuk, umurwa mukuru wa Greenland. Muri ibyo bice byombi bazakora inshingano z’ingenzi zijyanye n’ibikorwa bya gisirikare.
Nyuma, bamwe mu bazaba bari i Kangerlussuaq bazoherezwa i Nuuk, aho bazasimbura bagenzi babo, mu gihe bamwe mu bari i Nuuk na bo bazajya i Kangerlussuaq.
Izi nshingano ziri mu rwego rwa gahunda yo kongera igihe abasirikare bakora muri gisirikare, yashyizweho muri gahunda y’ingabo za Danimarike y’imyaka 2024–2033.
Ibyo bifite ku rwego rwa politiki
Kohereza aba basirikare muri Greenland bifite n’igisobanuro gikomeye muri politiki mpuzamahanga, cyane cyane kubera ko Perezida wa Leta Zunze Ubumwe za Amerika, Donald Trump, amaze igihe agaragaza ko ashaka ko Greenland iba mu maboko ya Amerika, avuga ko ari ikibazo kijyanye n’umutekano w’igihugu cye.
Mu ntangiriro z’uku kwezi, Danimarike yatangiye gahunda nshya yo kwinjiza abasirikare, aho abantu 1,600 bashyizwe muri gahunda nshya y’amezi 11.
Aba basirikare bazamara amezi atanu mu myitozo y’ibanze, akurikirwe n’andi mezi atandatu bakora imirimo ya gisirikare ijyanye n’imirwano.
Ingabo za Danimarike kandi zatangiye gushyiraho izindi gahunda zihariye mu gisirikare, zirimo umutwe w’abasirikare bakoresha indege zitagira abapilote (drones) uzaba uri mu rwego rushinzwe ibikorwa byihariye bya gisirikare.
Muri Danimarike, gahunda yo gutoranya abasirikare ishingiye ku buryo bwa tombola bukorwa mu rubyiruko rw’abafite nibura imyaka 18 kandi rwujuje ibisabwa mu buzima.
Nubwo bimeze gutyo, mu myaka myinshi ishize abenshi mu binjira mu gisirikare cya Danimarike babaga abitanze ku bushake, maze uburyo bwa tombola bugakoreshwa cyane cyane mu kuzuza imyanya yaba isigaye.
Kohereza abasirikare bashya muri Greenland rero bije mu gihe aka gace gakomeje kugira agaciro gakomeye ku mutekano n’imibanire ya Danimarike, Amerika ndetse n’ibihugu byo mu Majyaruguru y’Isi.
Rwandatribune.rw
