Ikigo cy’u Rwanda gishinzwe Ubumenyi bw’Ikirere (Meteo Rwanda) cyatangaje ko mu gihembwe cy’imvura y’Umuhindo wa 2026 hitezwe imvura nyinshi iri hejuru y’isanzwe igwa muri iki gihe.
Meteo Rwanda ivuga ko kuva muri Nzeri kugeza mu Ukuboza 2026, imvura ishobora kugera hagati ya milimetero 300 na 1,000 mu bice bitandukanye by’u Rwanda.
Iki gipimo kiri hejuru y’impuzandengo y’imvura isanzwe igwa mu gihe cy’Umuhindo, kuko mu myaka 30 ishize iyi mpuzandengo yari hagati ya milimetero 279 na 962.
Iri teganyagihe rije mu gihe inzego zishinzwe gukurikirana ibihe zishishikariza abaturage gukomeza kwitwararika ingaruka zishobora guterwa n’imvura nyinshi, zirimo imyuzure, inkangu ndetse n’iyangirika ry’ibikorwa remezo.
Meteo Rwanda isanzwe itanga amakuru y’iteganyagihe n’imbuzi ku bijyanye n’ibihe bishobora guteza ibyago, mu rwego rwo gufasha abaturage n’izindi nzego kwitegura no kugabanya ingaruka z’ibiza.
Rwandatribune.rw
