Uburusiya na Koreya ya Ruguru byafunguye ku mugaragaro ikiraro cya mbere cy’imodoka kibihuza, mu muhango wabaye ku wa Mbere tariki ya 7 Nzeri 2026.
Iki kiraro cyambukiranya uruzi rwa Tumen, ku mupaka w’ibihugu byombi, kikaba gihuza agace ka Khasan mu burasirazuba bw’u Burusiya na Tumangang muri Koreya ya Ruguru.
Ikiraro gifite kilometero imwe
Iki kiraro gifite uburebure bwa hafi kilometero imwe, kikaba gifite imihanda ibiri y’imodoka.
Biteganyijwe ko kizajya cyakira imodoka zigera kuri 300 ku munsi, bityo kikazafasha mu gutwara abantu n’ibicuruzwa hagati y’ibihugu byombi.
Iki kiraro cyahawe izina rya Yakov Novichenko, umusirikare w’Abasoviyeti Koreya ya Ruguru ifata nk’intwari kubera uruhare yagize mu kurinda ubuzima bwa Kim Il-sung mu 1946.
Ku munsi wo gufungura, amakamyo n’izindi modoka zambutse kuri iki kiraro, bigaragaza ko inzira nshya yo gutwara abantu n’ibintu hagati y’ibihugu byombi yatangiye gukoreshwa.
Minisitiri w’Intebe w’u Burusiya, Mikhail Mishustin, na Minisitiri w’Intebe wa Koreya ya Ruguru, Pak Thae-song, bitabiriye umuhango wo gufungura iki kiraro binyuze kuri videwo, buri umwe ari mu gihugu cye.
Mu butumwa bwabo, bagaragaje ko iki kiraro ari intambwe ikomeye mu kongera ubufatanye hagati y’ibihugu byombi, cyane cyane mu bijyanye n’ubucuruzi, ubukungu, ikoranabuhanga, ubumenyi n’umuco.
Ifungurwa ry’iki kiraro ribaye mu gihe umubano hagati y’Uburusiya na Koreya ya Ruguru ukomeje gukomera, haba mu by’ubukungu ndetse no mu bya gisirikare.
Ibihugu byombi byongereye ubufatanye kuva u Burusiya bwatangira intambara muri Ukraine mu 2022.
Koreya ya Ruguru yashyigikiye u Burusiya mu buryo butandukanye, mu gihe Moscow na Pyongyang byakomeje kuvuga ko ubufatanye bwabyo bugamije guteza imbere umubano w’ibihugu byombi.
Iki kiraro rero ntikifatwa gusa nk’umushinga w’ibikorwa remezo, ahubwo gifatwa nk’ikimenyetso cy’uburyo umubano hagati y’Uburusiya na Koreya ya Ruguru ukomeje kwaguka.
Mbere y’iki kiraro, ibihugu byombi byari bifite Friendship Bridge, ahanini ikoreshwa na gari ya moshi. Ikiraro gishya cy’imodoka cyongeyeho indi nzira ishobora koroshya ubwikorezi bw’ibicuruzwa n’ingendo hagati y’impande zombi.
Abayobozi b’Uburusiya bavuga ko kongera ibikorwa remezo ku mupaka bizatanga imbaraga nshya ku bucuruzi n’ubufatanye bw’ubukungu hagati ya Moscow na Pyongyang.
Rwandatribune.rw
