Inzira ya Hormuz iri mu bice by’ingenzi ku bucuruzi mpuzamahanga, cyane cyane mu gutwara peteroli n’ibindi bicuruzwa biva mu Burasirazuba bwo Hagati.Ubu umutekano muke muri ako karere watumye impungenge ziyongera ku bwikorezi bwo mu nyanja n’uruja n’uruza rw’ibicuruzwa.
Ibihugu bigera kuri 80 byasabye ko iyi nzira yongera gufungurwa vuba, bigaragaza ko kubangamira urujya n’uruza rw’amato muri Hormuz bishobora kugira ingaruka ku bucuruzi mpuzamahanga no ku bwisanzure bwo kugenda mu mazi mpuzamahanga.
Mu itangazo bihuriyeho, ibyo bihugu byamaganye ibikorwa bya Iran ndetse n’iby’umutwe w’Aba-Houthi ukorera muri Yemen, bikavuga ko ibikorwa by’umutekano muke muri ako karere bishobora gushyira mu kaga ubwikorezi bwo mu nyanja.
Minisitiri w’Ububanyi n’Amahanga wa Bahrain, Abdullatif bin Rashid Al Zayani, yavuze ko ibikorwa bya Iran muri Inzira ya Hormuz bikomeje kubangamira uburenganzira mpuzamahanga bwo kugenda n’ubwisanzure bwo gutwara abantu n’ibicuruzwa.
Yagize ati: “Ibikorwa bya Iran mu nzira ya Hormuz bikomeje kubangamira uburenganzira mpuzamahanga bwo kugenda n’ubwisanzure bwo gutwara abantu n’ibicuruzwa.”
Ku birebana n’Aba-Houthi, ibihugu byamaganye ibyo byise gukaza ibikorwa by’imirwano muri Yemen, ndetse n’ibitero byakorewe ku Nyanja Itukura.
Bavuze ko ibyo bikorwa bishobora kurushaho guhungabanya ubwikorezi n’ubucuruzi mpuzamahanga.
Muri iryo tangazo bagize bati: “Turamagana byimazeyo icyemezo cy’Aba-Houthi cyo gukaza imirwano muri Yemen, ndetse n’ibitero bikomeje gukorwa ku Bwami bwa Arabie Saoudite mu Nyanja Itukura, ibikorwa bishobora kongera guteza akaga ubucuruzi mpuzamahanga n’ubwigenge bwo kugenda mu mazi.”
Inzira ya Hormuz ifite umwanya ukomeye mu bucuruzi bw’ingufu ku Isi, kuko ari imwe mu nzira nyamukuru zinyuzwamo peteroli n’ibindi bicuruzwa byinshi. Kubangamira umutekano w’iyi nzira bishobora kugira ingaruka ku isoko mpuzamahanga ry’ingufu ndetse no ku bihugu byinshi bishingira ubukungu ku bicuruzwa bituruka mu Burasirazuba bwo Hagati.
Rwandatribune.rw
