Urukiko rwa Old Bailey i Londres mu Bwongereza rwategetse ko Dr. Vincent Bajinya, wiyise Vincent Brown, akomeza gukurikiranwa ari hanze ya gereza, nyuma yo kwitaba urukiko kuri uyu wa Mbere tariki ya 28 Nzeri 2026.
Umucamanza Mark Lucraft KC yamutegetse gutanga ingwate ya £100,000, ni ukuvuga hafi miliyoni 150 z’amafaranga y’u Rwanda, ndetse ashyirwaho uburyo bwo gukurikiranwa hakoreshejwe ikoranabuhanga kugira ngo hatagira uburyo atoroka ubutabera.
Dr. Bajinya w’imyaka 65, ni we muntu wa mbere ugejejwe imbere y’urukiko rwo mu Bwongereza ashinjwa ibyaha bifitanye isano na Jenoside yakorewe Abatutsi mu Rwanda.
Ubushinjacyaha bw’u Bwongereza bumushinja kugira uruhare mu bikorwa byo kwica Abatutsi mu Mujyi wa Kigali hagati ya tariki ya 6 n’iya 13 Mata 1994, birimo gushishikariza abantu gukora Jenoside, kuyobora ibitero by’abicanyi ndetse no kugira uruhare mu iyicwa ry’abantu batandatu.
Abashinjwa kwicwa muri ibyo bikorwa ni Dominique Mukurarinda, Immaculee Mukankusi, Gerasi Rurangirwa, Leandre Mbogoye, Charlotte Kamaguja na Olivier Tuyishime.
Mu bo Ubushinjacyaha buvuga ko bishwe harimo abantu bo mu muryango umwe, umushoferi wa taxi, ndetse n’umugore n’umwana we muto.
Dr. Bajinya, wahoze yitwa Vincent Bajinya ariko ubu akoresha izina Vincent Brown, ahakana ibyaha byose aregwa.
Yatuye mu gace ka Islington mu majyaruguru ya Londres, kandi dosiye ye yagejejwe mu rukiko nyuma y’iperereza ry’Abongereza ryamaze imyaka irindwi.
Umwunganizi we, Me Sam Blom-Cooper, yavuze ko kuba umukiliya we yagejejwe imbere y’urukiko ari amahirwe yo kubona uburyo asobanura uruhare rwe muri ibyo birego no gusukura izina rye.
Ati: “Ibi ni ibyaha biteye ubwoba, ubwicanyi bukomeye bwabaye mu 1994. Ariko ibi ni intangiriro y’iherezo kuri Bwana Brown.”
Rwandatribune.rw
