Arkiyepiskopi wa Arikidiyosezi ya Lusaka muri Zambia, Musenyeri Alick Banda, yarekuwe nyuma yo kumara ijoro muri gereza, nyuma yo kuzuza ibisabwa n’Urukiko rwa Lusaka kugira ngo abone ingwate.
Banda yari yafashwe n’Urwego rushinzwe kurwanya ibyaha birimo ruswa n’ibindi byaha bifitanye isano n’umutungo, DEC, akekwaho gutunga umutungo wabonetse mu buryo bunyuranyije n’amategeko.
Urukiko rwa Lusaka rwari rwategetse ku wa Mbere tariki ya 28 Nzeri 2026 ko Arkiyepiskopi Banda atanga ingwate ingana na 80,000 Kwacha, amafaranga akoreshwa muri Zambia, ahwanye na hafi 4,108 by’amadolari ya Amerika.
Ubushinjacyaha buvuga ko urubanza rwe rufitanye isano n’imodoka yo mu bwoko bwa Toyota Hilux atunze, ikekwa kuba yarabonetse mu buryo bunyuranyije n’amategeko.
Ni imodoka Ubushinjacyaha buvuga ko yahoze ari iy’Urwego rw’Imisoro n’Amahoro muri Zambia, ZRA.
Nyuma yo kuzuza ibisabwa kugira ngo ingwate ye yemezwe, Arkiyepiskopi Banda yahise arekurwa, asubira mu mirimo ye isanzwe muri Arikidiyosezi ya Lusaka.
Rwandatribune.rw
