Haravugwa ko ku mugoroba wo ku wa Kabiri, tariki ya 1 Nzeri 2026, habaye kurasana hagati y’ingabo z’u Rwanda n’iz’u Burundi ku Kiyaga cya Cyohoha, ku mupaka uhuza ibihugu byombi.
Amakuru yatangajwe n’uruhande rw’u Burundi avuga ko intandaro y’iyi mirwano yari abana bari bagiye kuroba muri icyo kiyaga, bakaza kurenga ku murongo ugabanya amazi y’u Rwanda n’u Burundi.
Raporo yaturutse mu Burundi ivuga ko abasirikare b’u Rwanda barinda amazi bakurikiranye abo bana, na bo bakinjira mu gice cy’ikiyaga kiri ku ruhande rw’u Burundi.
Ibi ngo byaje gutuma ingabo z’u Burundi zitabara, maze habaho kurasana hagati y’impande zombi.
Sos media Burundi ivuga ko Ibyo byabereye hafi y’umusozi wa Cimo, muri zone ya Kiri, mu ntara ya Kirundo, mu majyaruguru y’u Burundi.
Amakuru aturuka ku ruhande rw’u Burundi avuga kandi ko habanje kuraswa amasasu yo kuburira, mbere y’uko abasirikare b’u Rwanda na bo batangira kurasa.
Umwe mu Bayobozi b, Imbonerakure muri ako gace utashatse ko amazina ye atangazwa yavuze ko abasirikare b’u Rwanda baje gusubira ku ruhande rw’u Rwanda nyuma y’akanya gato.
Kugeza ubu, nta muntu wapfuye cyangwa wakomeretse wemejwe muri iki gikorwa, kandi nta byangiritse bikomeye byatangajwe.
Abaturage bari hafi y’ikiyaga ngo bari bahunze ingo zabo mu gihe cy’amasasu, ariko nyuma y’uko ibintu bituje bamwe batangiye gutaha.
Umupaka wo ku mazi ushobora guteza amakimbirane
Ikiyaga cya Cyohoha, kizwi nka Cohoha mu Burundi, ni kimwe mu biyaga bisangiye umupaka w’u Rwanda n’u Burundi. Umupaka ukinyuramo ku buryo hari ibice by’ikiyaga biri mu Rwanda n’ibindi biri mu Burundi.
Abatuye muri ako gace bakunze kwishingikiriza ku burobyi, ku buryo kurenga ku murongo w’umupaka wo mu mazi bishobora gutera amakimbirane hagati y’abaturage n’inzego z’umutekano.
Amakuru yo ku ruhande rw’u Burundi avuga ko iki kibazo cyo kurenga ku murongo w’umupaka ku Kiyaga cya Cyohoha kimaze igihe kibaho kubera ko bitorohera umuntu uri mu mazi Kumenya umurongo atagomba kurenga.
Kugeza ubwo iyi nkuru yandikwaga, nta tangazo ryari ryasohowe ku mugaragaro na RDF risobanura iby’iki gikorwa cyangwa ngo rishyire ahagaragara uko uruhande rw’u Rwanda rubibona.
Twashatse kumenya icyo uruhande rw, igisilikare cya FDNB kibivugaho duhamagara Umuvugizi wayo Brigadier general Gaspard Baratuza ntitwamubona kuri telephone ye igendananywa.
Nubwo bimeze bityo nta ruhande rudafite aho rubogamiye ruremeza ayo makuru .
Ibyabaye kuri Cyohoha bibaye mu gihe umubano hagati y’u Rwanda n’u Burundi umaze igihe urangwa n’umwuka mubi ndetse n’ibirego by’impande zombi bijyanye n’umutekano wo ku mipaka.
Rwandatribune irakomeza gukurikirana amakuru aturuka ku mpande zombi, cyane cyane niba hari itangazo rishya riturutse ku buyobozi bw’u Rwanda cyangwa ku ngabo z’ibihugu byombi.
Icyitegetse Florentine
Rwandatribune.rw
