Ubuyobozi bw’u Burundi bwatangiye igikorwa cyo gukura ku isoko inzoga butangaza ko zitujuje ubuziranenge, ndetse hafungwa zimwe mu nganda zakoreshaga uburyo bunyuranyije n’amategeko.
Iki gikorwa cyatangijwe ku wa 25 Kanama 2026, mu rwego rwo kurengera ubuzima bw’abaturage no gukumira ibinyobwa bisembuye bishobora kubagiraho ingaruka.
Abayobozi bakuru b’u Burundi, barimo Minisitiri w’Ubutegetsi bw’Igihugu, Iterambere Rusange n’Umutekano, Léonidas Ndaruzaniye, hamwe na Minisitiri w’Ubucuruzi n’Inganda, Hassan Kibeya, ni bo bayoboye ibikorwa byatangiriye mu bice bya Nyanza na Makamba, mu Ntara ya Burunga.
Muri ibyo bikorwa, hafunzwe uruganda rwa Nganji Company, ndetse n’inzoga rwakoraga zitwa Gangi ziramenwa.
Hari n’izindi nzoga zashyizwe ku rutonde rw’ibigomba gukurwa ku isoko, zirimo Umururasase, Buzima Bwiza, Burunga Wine na Dodjho.
Minisitiri Hassan Kibeya yavuze ko ingamba zafashwe zigamije gushyira imbere ubuzima bw’abaturage no guca akajagari kari mu ikorwa n’icuruzwa ry’ibinyobwa bisembuye.
Yagize ati ubuyobozi bushaka igihugu gifite abaturage bafite ubuzima bwiza kandi bashobora gukora bakiteza imbere, bityo ko ibikorwa bikorerwa mu buryo butubahiriza amategeko bitagomba gukomeza.
Iki cyemezo kandi kije mu gihe abayobozi b’u Burundi bamaze iminsi bagaragaza impungenge ku ngaruka z’inzoga zitujuje ubuziranenge, cyane cyane ku buzima n’imibereho y’abaturage.
Daniel Gélase Ndabirabe, uyobora Inteko Ishinga Amategeko y’u Burundi, na we yari aherutse kunenga ikibazo cy’inzoga zishobora gutuma abaturage bagira ibibazo bikomeye, avuga ko hari bamwe mu bayobozi bakuru batabona uburemere bw’iki kibazo kuko baba bakorera kure y’abaturage.
Ubuyobozi bw’u Burundi buvuga ko ibikorwa byo kugenzura inganda n’ibinyobwa bisembuye bizakomeza, mu rwego rwo gukumira ko inzoga zitujuje ibisabwa zikomeza kugera ku baturage.
Rwandatribune.rw
