Guverinoma ya Repubulika Iharanira Demokarasi ya Congo (RDC) yatangaje ko iri gutegura kwimura umurambo wa Jenerali Mamadou Ndala, ukavanwa aho ushyinguwe ubu, ukajyanwa mu irimbi rya Repos du Soldat riherereye i Kinshasa, muri Komini ya Nsele.
Minisitiri wungirije ushinzwe Ingabo, ufite mu nshingano abahoze ari abasirikare, Éliezer Ntambwe Mposhi, yavuze ko iki gikorwa kigamije guha Mamadou Ndala icyubahiro gikwiye, bitewe n’umurage yasize mu gisirikare cya Congo no ku ruhare yagize mu rugamba rwo kurwanya imitwe yitwaje intwaro.
Ntambwe Mposhi yavuze ko inzego za Leta ziri gutegura uburyo umurambo wa Mamadou Ndala uzavanwa aho ushyinguwe ubu, ukajyanwa i Kinshasa, aho azashyingurwa mu irimbi rya Repos du Soldat.
Guverinoma ya RDC kandi yatangaje ko ifite gahunda yo kongera no gukwirakwiza amarimbi ya Repos du Soldat mu bice bitandukanye by’igihugu.
Iyi gahunda igamije kugira ahantu hihariye hashyingurwa abasirikare baguye mu kazi ko kurinda igihugu, ndetse no kubaha icyubahiro gikwiye.
Mamadou Ndala, wari ufite ipeti rya Colonel mu ngabo za FARDC, yishwe ku wa 2 Mutarama 2014 mu gace ka Beni, muri Kivu y’Amajyaruguru, nyuma y’uko imodoka yari imutwaye igabweho igitero.
Muri icyo gihe, Ndala yari azwi cyane kubera ibikorwa bya gisirikare byo kurwanya imitwe yitwaje intwaro mu burasirazuba bwa RDC, by’umwihariko mu Ntara ya Kivu y’Amajyaruguru.
Kumwimurira i Kinshasa no kumushyingura mu irimbi rya Repos du Soldat biri muri gahunda Leta ya RDC ivuga ko igamije kubungabunga umurage w’abasirikare baguye ku rugamba no kubaha icyubahiro nk’intwari z’igihugu.
Rwandatribune.rw
