Umunyamabanga Mukuru w’ishyaka UDPS riri ku butegetsi muri Repubulika Iharanira Demokarasi ya Congo, Augustin Kabuya, yanenze bikomeye uwahoze ari Perezida w’iki gihugu, Joseph Kabila, nyuma yo gutangaza ko ayoboye ihuriro rya politiki n’igisirikare ryitwa Front pour la Refondation de la Nation (FRN), amugereranya n’uwahoze ari umuyobozi w’inyeshyamba zo muri Angola, Jonas Savimbi.
Ku wa Kabiri, tariki ya 13 Ukwakira 2026, Kabuya yavuze ko Kabila ashobora kurangiza nka Savimbi, wamaze igihe kinini ahanganye n’ubutegetsi bwa Angola ndetse n’umuryango mpuzamahanga.
Yabitangaje mu kiganiro yagiranye na Christophe Mboso Nkodia Mpwanga ku cyicaro cy’ishyaka UDPS.
Kabuya yavuze ko mu bihe byashize, Savimbi na we yigeze guhangara umuryango mpuzamahanga, agaragaza ko ibyo Kabila arimo gukora bishobora kugira ingaruka zisa n’izabaye kuri uwo munyapolitiki wo muri Angola.
Yakomeje avuga ko hari abatekereza ko kuba Kabila ari umusirikare bituma ashobora gukora ibyo yishakiye, ariko ko amateka ashobora kongera kwigaragaza muri Repubulika Iharanira Demokarasi ya Congo.
Kabuya kandi yavuze ko ibyabaye bitamutunguye, kuko Perezida Félix Tshisekedi yari yarigeze kuvuga ibyo ashinja uwo yasimbuye ku butegetsi, nubwo hari abatarabyemeye.
Yagize ati: “Ibi si ibintu bitunguranye. Perezida Félix Tshisekedi yari yarabivuze mbere, ariko hari abantu batashakaga kwemera ubutumwa bwe. Ubu amateka aratugarutseho twese.”
Kabuya yasobanuye ko abona kuba Kabila ayoboye FRN ari uburyo bwo gushyira ku mugaragaro uruhare amushinja kugira mu mutwe urwanya ubutegetsi bwa Tshisekedi.
Iri tangazwa rije mu gihe imitwe yitwaje intwaro ikomeje kugenzura ibice bitandukanye byo mu burasirazuba bwa Congo, birimo imijyi ya Goma na Bukavu.
Aka karere gakomeje kurangwa n’imirwano, iyimuka ry’abaturage n’ibikorwa bya dipolomasi bigamije kugarura amahoro.
Kabuya yasoreje ku kuvuga ko Kabila akomeje gutsimbarara ku cyemezo cye no guhangara umuryango mpuzamahanga, avuga ko hazarebwa uko ibintu bizagenda mu gihe kiri imbere.
Yagize ati: “Kabila arakomeje gutsimbarara no guhangara umuryango mpuzamahanga. Reka turebe icyo ejo hazaza haduhishiye.”
Jonas Savimbi yari umunyapolitiki n’umuyobozi w’inyeshyamba zo muri Angola, igihugu giherereye mu majyepfo y’uburengerazuba bw’Afurika. Yamenyekanye cyane kubera kuyobora umutwe wa UNITA wamaze imyaka myinshi urwana n’ubutegetsi bwa Angola.
Rwandatribune.rw
