Inteko ishinga amategeko ya Repubulika iharanira Demokarasi ya Congo yongeye kwemeza itegeko rigena uburyo referendum izajya itegurwa kandi igakorwa muri icyo gihugu, nyuma yo gusubiramo umushinga waryo no kwinjizamo impinduka zari zasabwe n’Urukiko rushinzwe kurinda Itegeko Nshinga.
Icyemezo cyafashwe ku wa 23 Ukwakira 2026, mu gihe igihugu gikomeje impaka ku miyoborere, Itegeko Nshinga n’ibiganiro bya politiki byatangajwe na Perezida Félix Tshisekedi.
Umushinga w’iri tegeko wari wasubijwe mu Nteko kugira ngo hasuzumwe ingingo 13 Urukiko rushinzwe kurinda Itegeko Nshinga rwari rwaragaragaje ko zikwiye kunozwa.
Nyuma yo gusuzuma izo ngingo, abadepite bongeye kwemeza umushinga.
Iri tegeko rigena uburyo abaturage bashobora gutora muri referendum ku bibazo by’ingenzi by’igihugu, harimo n’ibishobora kuba bifitanye isano no guhindura Itegeko Nshinga.
Icyakora, bamwe mu batavuga rumwe n’ubutegetsi bagaragaje ko batishimiye uburyo umushinga wasuzumwe.
Christian Mwando, uyobora itsinda ry’abadepite ba Ensemble pour la République, yavuze ko kwemeza itegeko hatabayeho uruhare rw’abatavuga rumwe n’ubutegetsi bishobora kubangamira ibiganiro by’igihugu byatangajwe na Perezida Tshisekedi.
Ku ruhande rw’abashyigikiye ubutegetsi, kwemeza iri tegeko byafashwe nk’igikorwa gisanzwe cy’Inteko Ishinga Amategeko, aho ibyemezo bishobora gufatwa hakurikijwe amajwi y’abadepite.
Nyuma yo kongera kwemezwa n’Inteko Ishinga Amategeko, umushinga ugomba gusubira muri Sena kugira ngo wongere usuzumwe mbere yo gushyikirizwa Perezida wa Repubulika kugira ngo awutangaze nk’itegeko.
BARAKA ESTHER
Rwandatribune.rw
