Mu gihe Repubulika Iharanira Demokarasi ya Congo ikomeje guhura n’ibibazo bikomeye by’umutekano, ubukungu n’imiyoborere, bamwe mu banyapolitiki batavuga rumwe n’ubutegetsi bakomeje kugaragaza ko batishimiye uko igihugu kiyobowe na Perezida Félix Tshisekedi.
Abo banyapolitiki basaba ko habaho impinduka zifatika zishyira imbere inyungu rusange z’abaturage.
Mu ijambo rikomeye ryavuzwe na Denis Sesanga, yagaragaje ko Congo idakwiye gufatwa nk’igihugu gishobora gukoreshwa uko bishakiye cyangwa kikagirwa igikoresho cy’abandi.
Yibukije Perezida Tshisekedi ko akwiye kwisubiraho, akibanda ku nshingano ze zo kurinda ubusugire bw’igihugu no gukorera inyungu z’abaturage.
Aya magambo agaragaza ko mu batavuga rumwe n’ubutegetsi hari kwiyongera impungenge ku mikorere ya leta, aho bamwe bayishinja kudaha agaciro inyungu z’igihugu, ahubwo hagafatwa ibyemezo bidafitiye abaturage umumaro.
Muri iyi minsi, amajwi y’abanenga ubutegetsi agenda arushaho kwiyongera, ndetse bamwe muri bo batangiye gushaka uburyo bwo kwishyira hamwe kugira ngo bagire imbaraga mu guhangana na leta iriho. Ibi birimo kuba mu gihe igihugu gikomeje guhura n’ibibazo by’umutekano mu burasirazuba, aho imirwano ikomeje guhuza ingabo za leta n’imitwe yitwaje intwaro.
Abatavuga rumwe n’ubutegetsi bemeza ko ikibazo cy’umutekano gikomeje kudindira kubera imiyoborere idahagije, kandi ko habura umurongo uhamye wo gukemura ibibazo bikomeye igihugu gifite.
Hari kandi impungenge zigaragazwa n’aba banyapolitiki ku bijyanye n’ubusugire bw’igihugu, aho bavuga ko hashobora kuba hari imikoranire idasobanutse n’amahanga ishobora gushyira mu kaga ubwisanzure bwa Congo.
Nubwo ubutegetsi bwa Kinshasa bwagiye buhakana ibyo bushinjwa, buvuga ko buri gukora ibishoboka byose mu kurinda inyungu z’igihugu no kugarura amahoro, abatavuga rumwe na bwo bakomeje gusaba ibisobanuro bisobanutse ndetse n’impinduka mu miyoborere.
Kugeza ubu, umwuka wa politiki uragenda uba mubi, aho impande zombi zikomeje guterana amagambo. Ibi bishobora kuvamo ihuriro rikomeye ry’abatavuga rumwe n’ubutegetsi, rigamije guhangana na Perezida Tshisekedi mu bihe biri imbere, cyane cyane mu gihe amatora ataha agenda yegereza.
Abasesenguzi mu bya politike bo bavuga ko uku gushyirahamwe kw’abatavuga rumwe n’ubutegetsi bishobora kuzana impinduka muri iki gihugu.
Abaturage bo bakomeje gukurikiranira hafi ibyo bibazo bya politiki, bizeye ko hazaboneka ibisubizo birambye bizashyira imbere amahoro, ubumwe n’iterambere ry’igihugu.
rwandatribune.rw
