Umunyamabanga Nshingwabikorwa w’Umurenge wa Kansi mu Karere ka Gisagara, Gasana Isaie, yatawe muri yombi akekwaho kugira uruhare mu guhishira uruganda rukora inzoga zitujuje ubuziranenge.
Rwanda Tribune yamenye ko Gasana Isaie yatawe muri yombi ku wa Kane, tariki ya 6 Kanama 2026, akaba afungiye kuri Sitasiyo ya RIB ya Ndora, mu Karere ka Gisagara.
Uyu muyobozi akekwaho guhishira ibikorwa by’uruganda rukora inzoga zitujuje ubuziranenge mu Murenge wa Kansi ayoboye, mu gihe inzego z’umutekano n’ubugenzacyaha zimaze iminsi zikaza ibikorwa byo kurwanya ibinyobwa bikekwa ko bishobora guteza ibibazo ku buzima bw’abaturage.
Umuyobozi w’Akarere ka Gisagara wungirije ushinzwe iterambere ry’ubukungu, Habineza Jean Paul, yabwiye itangazamakuru ko Umunyamabanga Nshingwabikorwa w’Umurenge wa Kansi ari gukurikiranwa n’Urwego rw’Igihugu rw’Ubugenzacyaha (RIB), ariko ntiyatangaza birambuye ibyaha akekwaho.
Rwanda Tribune kandi yamenye ko Gitifu wa Kansi atari we wenyine uri gukurikiranwa muri iki kibazo, kuko amakuru avuga ko n’Umukuru w’Umudugudu uruganda rukekwaho gukora inzoga zitujuje ubuziranenge rwubatsemo na we yatawe muri yombi.
Abantu 80 bamaze gutabwa muri yombi
Ifatwa ry’aba bayobozi rije mu gihe u Rwanda rwakajije ibikorwa byo kurwanya inganda n’abantu bakekwaho gukora cyangwa gukwirakwiza ibinyobwa bitujuje ubuziranenge.
Ku wa Gatandatu, RIB na Polisi y’u Rwanda berekanye abantu 16, barimo ba nyiri inganda ndetse n’abakozi bazo, bakekwaho gukora ibinyobwa bitujuje ubuziranenge, bimwe muri byo bikaba byaravuzwe ko byagize ingaruka ku buzima bw’ababinyoye.
Inzego z’umutekano zatangaje ko abantu 80 bamaze gutabwa muri yombi hirya no hino mu gihugu, muri bo hakaba harimo n’abayobozi bo mu nzego zitandukanye.
RIB na Polisi byavuze ko iperereza rigikomeje, ku buryo hari abashobora kurekurwa mu gihe bitagaragaye ko bafite uruhare mu byaha bikurikiranwa, mu gihe abandi bashobora gutabwa muri yombi bitewe n’ibizagaragazwa n’iperereza.
Rwandatribune.rw
