Ishyirwaho ry’ihuriro rya politiki ryiswe Front pour la Refondation de la Nation (FRN), riyobowe na Joseph Kabila wahoze ari Perezida wa Repubulika Iharanira Demokarasi ya Congo (RDC), rishobora kugira ingaruka ku miterere ya politiki n’umutekano muri iki gihugu, cyane cyane mu gihe gisanzwe gihanganye n’intambara mu burasirazuba.
Gilbert Rubuga, umunyapolitiki akaba n’impuguke yigenga mu gusesengura ibya politiki, agaragaza ibintu bitatu abona ko bishobora gutuma ibibazo bya RDC birushaho gukomera nyuma y’ishyirwaho ry’iri huriro.
Icya mbere ni kugaruka kwa Joseph Kabila ku ruhando rwa politiki, ashobora kongera kugira uruhare mu guhindura imikoranire y’abanyapolitiki n’imbaraga z’impande zitandukanye.
Rubuga avuga ko ibyo bishobora kongera ubushyamirane hagati y’abatavuga rumwe n’ubutegetsi n’ababushyigikiye, bikazana ikindi cyiciro cy’ihangana rya politiki.
Ikindi kintu agarukaho ni uko FRN ishobora gukurura abandi banyapolitiki n’abaturage.
Iri huriro rishobora kuba urubuga ruhuriraho abantu batari barafata icyemezo cyo gushyigikira uruhande runaka, bigatuma bamwe bahindura imikoranire yabo ya politiki cyangwa bakongera gusuzuma aho bahagaze ku bibazo byugarije igihugu.
Rubuga kandi agaragaza ko hakwiye gukurikiranwa ibyago by’uko bamwe mu basirikare ba FARDC cyangwa abarwanyi bo mu mitwe ya Wazalendo bashobora guhindura uruhande bashyigikiye.
Mu gihe ibyo byaba bibaye, ingaruka ntizagarukira muri politiki gusa, ahubwo zishobora no kugira uruhare mu guhindura imiterere y’umutekano ku rugamba.
Ibi bibaye mu gihe RDC ikomeje guhangana n’intambara mu burasirazuba bw’igihugu, aho impinduka mu mikoranire y’abanyapolitiki n’imitwe yitwaje intwaro zishobora kugira ingaruka ku bikorwa bya gisirikare no ku nzira zishakwa zo gukemura amakimbirane.
Nubwo ibi ari ibyago Gilbert Rubuga agaragaza, ingaruka nyazo z’ishyirwaho rya FRN ntiziramenyekana.
Zizaterwa n’uko iri huriro rizakora, abo rizafatanya na bo ndetse n’uruhare rizagira mu bibazo bya politiki n’umutekano bya RDC.
Rubuga asanga uko ibintu bihagaze muri iki gihe bishobora kuba intandaro y’impinduka zikomeye mu minsi iri imbere, bityo agasaba ko hakurikiranwa neza ibizakurikira ishyirwaho ry’iri huriro.
Rwandatribune.rw
