Minisiteri y’Ubutabera muri Repubulika Iharanira Demokarasi ya Congo (RDC) yemeje ko umunyamuryango w’imbuga nkoranyambaga uzwi nka Denise Dusauchoy, amazina ye nyakuri akaba ari Denise Mukendi, yatawe muri yombi muri Tanzania ku wa 30 Kanama 2026.
Minisiteri y’Ubutabera ya RDC yatangaje kuri uyu wa Kabiri tariki ya 1 Nzeri 2026 ko ifatwa rye ryabaye mu rwego rw’ubufatanye bw’ubutabera hagati y’ibihugu.
Mu itangazo Minisiteri y’Ubutabera yashyize hanze mu gitondo cyo kuri uyu wa Kabiri, yavuze ko Denise Dusauchoy yafashwe n’inzego z’umutekano za Tanzania zishyira mu bikorwa impapuro mpuzamahanga zo kumuta muri yombi zatanzwe n’ubutabera bwa RDC.
Minisiteri yavuze ko iki gikorwa cyakurikiye ibikorwa bitandukanye by’ubutabera byakozwe mu rwego rwo gukurikirana dosiye z’imanza nshinjabyaha zikiri mu iperereza.
Ubucamanza bwa RDC buvuga ko uru rubanza rufite inkomoko mu bikorwa by’ubutabera byatangiye mu mwaka wa 2025.
Mu Ukwakira no mu Gushyingo 2025, Umushinjacyaha Mukuru muri Cour de cassation ya RDC yari yaragejeje ku nzego z’ubutabera z’u Bubiligi ubusabe butatu mpuzamahanga bwo gukora iperereza, buzwi nka commissions rogatoires internationales.
Iyi mirimo y’ubutabera yari ifitanye isano na dosiye nyinshi zari zifunguwe n’Ubushinjacyaha Bukuru bwa Kinshasa/Gombe, aho harimo na Denise Dusauchoy ndetse n’abandi bantu.
Muri izo dosiye kandi, hatanzwe impapuro mpuzamahanga zo guta abantu muri yombi.
Minisiteri y’Ubutabera ya RDC yashimiye inzego za Tanzania ku bufatanye yagize muri iki gikorwa, ivuga ko zagaragaje ubufatanye bwihuse mu ishyirwa mu bikorwa ry’ubutabera.
Gusa Minisiteri yagaragaje ko ifatwa rya Denise Dusauchoy ubwaryo ridahita risobanura ko ahamwa n’ibyaha akurikiranyweho.
Yibukije ko akomeza gufatwa nk’umwere kugeza igihe urukiko ruzaba rumuhamije icyaha binyuze mu cyemezo cya nyuma kidashobora kongera kujuririrwa.
Ibi bivuze ko dosiye ya Denise Dusauchoy igikomeje mu nzira z’ubutabera, kandi ibijyanye n’ibyaha akurikiranyweho bizasuzumwa n’inzego zibifitiye ububasha.
Rwandatribune.rw
