Mu gihe umwuka wa politiki mpuzamahanga ukomeje gukaza umurego ku kibazo cya Iran, havutse impaka zikomeye hagati ya Donald Trump n’Umushumba wa Kiliziya Gatolika ku Isi, Papa Leo XIV.
Izi mpaka zatumye habaho ibiganiro ku ruhare rw’abayobozi b’amadini n’abanyapolitiki mu bibazo by’umutekano w’isi.
Byatangiye ubwo Trump yanyuzaga ubutumwa ku rubuga rwe rwa Truth Social, anenga bikomeye Papa Leo XIV, amushinja kutumva neza ibijyanye na dipolomasi n’umutekano mpuzamahanga.
Yagaragaje ko adashyigikiye imyumvire y’umuyobozi w’idini wemera ko Iran ishobora gutunga intwaro za kirimbuzi, ibintu yavuze ko biteje impungenge zikomeye ku mutekano w’isi.
Trump yakomeje avuga ko ikibazo cya Iran kigomba gukemurwa hakoreshejwe igitutu gikomeye n’ingamba zikakaye, anagaragaza ko imyitwarire idakomeye ishobora gushyira isi mu kaga.
Yanavuze kandi ko iki kibazo gishobora gukemuka vuba mu gihe Iran yabyemera ikagana mu biganiro bigamije kugabanya ubushyamirane.
Ku rundi ruhande, Papa Leo XIV yamaganye ayo magambo ya Trump, ayita adahura n’indangagaciro z’ubumuntu n’amahame agenga amahoro ku isi.
Yashimangiye ko abayobozi bakwiye gushyira imbere ibiganiro n’ubwumvikane aho gukoresha imvugo zishobora gukongeza amakimbirane.
Papa yakomeje asaba ko hakwiye kwirindwa imvugo ziteranya cyangwa zishobora guteza ubwoba, agaragaza ko amahoro arambye adashoboka hatabayeho kumva no kuganira hagati y’impande zitandukanye.
Ibi byose bigaragaza itandukaniro rikomeye hagati y’imyumvire ya politiki ishingiye ku mutekano n’inyungu z’ibihugu, n’imyumvire y’amadini ishingiye ku ndangagaciro z’ubumuntu, amahoro n’ubwiyunge.
Ku ruhande rwa Trump, hibandwa ku gukumira Iran uko byagenda kose hakoreshejwe igitutu n’ingamba zikomeye, mu gihe ku ruhande rwa Papa Leo XIV hibandwa ku mahoro, ibiganiro n’ubwumvikane nk’inzira irambye yo gukemura amakimbirane.
rwandatribune.rw
