Ingabo za Islamic Revolutionary Guard Corps (IRGC) zatangaje ko zishe abagize umutwe wose w’abarwanyi bitwaje intwaro mu ntara ya Sistan na Baluchestan, iri mu majyepfo y’uburasirazuba bwa Iran.
Nk’uko byatangajwe na Press TV, abo barwanyi bari binjiye muri Iran baturutse mu gihugu gituranye, bitwaje intwaro n’amasasu, kandi bikekwa ko bari bafite umugambi wo kugaba igitero.
IRGC yavuze ko ibikorwa byo kubahashya byabaye mu rukerera, aho ingabo zayo zagabye igitero ku bari bamaze kwinjira mu gihugu. Uwo mutwe ngo wahise uraswa mbere y’uko ushyira mu bikorwa umugambi wari uteganyijwe.
Mu itangazo ryashyizwe ahagaragara n’izo ngabo, havuzwe ko ibikorwa byabaye mu gace kegereye umupaka, kandi ko byari bigamije gukumira ibikorwa by’iterabwoba no kurinda umutekano w’abaturage.
Sistan na Baluchestan ni imwe mu ntara za Iran zikunze kuvugwamo ibikorwa by’umutekano muke, cyane cyane ibikorwa by’imitwe yitwaje intwaro ikorera hafi y’umupaka wa Pakistan na Afghanistan.
Kugeza ubu, IRGC ntiratangaza umubare w’abarwanyi bishwe cyangwa igihugu uwo mutwe wari uturutsemo.
Nta makuru aramenyekana ku ngaruka zageze ku ngabo za Iran muri icyo gikorwa.
Iran ikomeje gushimangira ko izakaza ingamba zo guhangana n’imitwe yitwaje intwaro ishaka kwinjira ku butaka bwayo no guhungabanya umutekano w’igihugu.
Rwandatribune.rw
