Repubulika Iharanira Demokarasi ya Congo (RDC) yatangiye kwakira dose za mbere z’urukingo rwa Ebola mu gihe igihugu gikomeje guhangana n’icyorezo cyatewe na virusi ya Bundibugyo.
Ku wa Gatanu tariki ya 21 Kanama 2026, Minisitiri w’Ubuzima Rusange, Isuku n’Imibereho Myiza y’Abaturage, Dr Samuel Roger Kamba, yakiriye ku Kibuga Mpuzamahanga cy’Indege cya N’djili i Kinshasa, dose 16,520 z’urukingo Ervebo.
Izi dose ni igice cya dose 70,000 zose RDC yemerewe n’itsinda mpuzamahanga rishinzwe gucunga no gutanga inkingo mu bihe by’ibyorezo, rizwi nka ICG, ku bufatanye na OMS n’abandi bafatanyabikorwa.
Muri izo dose 70,000, 50,000 zizahabwa abakozi b’ubuzima n’abandi bari ku murongo wa mbere mu kurwanya Ebola, mu gihe 20,000 zizakoreshwa mu bushakashatsi bwa Phase 3, bugamije kureba niba urukingo Ervebo rushobora no gutanga ubwirinzi kuri virusi ya Bundibugyo iri gutera icyorezo muri RDC.
Minisiteri y’Ubuzima ya RDC yatangaje ko izindi dose zizakomeza kugera i Kinshasa, aho dose 50,120 zari ziteganyijwe kugezwa mu gihugu hagati ya tariki ya 21 na 24 Kanama.
Urukingo Ervebo rwakozwe na Merck kandi ruzwiho kuba rwaragaragaje ubushobozi bwo kurinda abantu virusi ya Ebola yo mu bwoko bwa Zaire. Ariko kandi, ntirurabonerwa uruhushya rwo gukingira virusi ya Bundibugyo, ari yo iri gutera icyorezo kiriho muri RDC.
OMS ivuga ko ubushakashatsi bw’ibanze bwakorewe muri laboratwari no ku nyamaswa bugaragaza ko rushobora kugira ubwirinzi runaka kuri iyo virusi, ariko ko hakenewe ibimenyetso byinshi ku bantu.
Uku kohereza inkingo gufatwa nk’intambwe ikomeye mu bikorwa byo guhangana n’iki cyorezo, cyane cyane mu kurinda abakozi b’ubuzima n’abandi bantu bari mu byago byinshi byo kwandura.
RDC yemerewe dose 70,000; muri zo 20,000 ni iz’ubushakashatsi, 50,000 zikaba izo gukingira abakozi b’ubuzima n’abari ku murongo wa mbere, naho dose 16,520 ni zo zatangiye kugera i Kinshasa ku cyiciro cya mbere.
Ebola ikomeje gukaza umurego muri RDC, aho abamaze guhitanwa n’icyorezo barenga 2,500. Kugeza ku wa 20 Kanama 2026, habaruwe 5,290 banduye, harimo 2,516 bapfuye. Iki cyorezo cyatangiriye muri Ituri ariko kimaze kugera mu ntara esheshatu za RDC, ndetse kikaba ari cyo cyorezo cya Ebola cyahitanye abantu benshi kurusha ibindi byigeze kuba muri iki gihugu.
Rwandatribune.rw
