U Rwanda rwongeye kugaragaza uruhare rukomeye rufite mu bikorwa byo kubungabunga amahoro ku rwego mpuzamahanga, binyuze mu kwitabira Ihuriro ry’Abafatanyabikorwa ba Gahunda ya Loni yo Kubaka Ubushobozi bw’Inzego Zigira Uruhare mu Butumwa bwo Kubungabunga Amahoro.
Iri huriro rya gahunda izwi nka United Nations Triangular Partnership Programme (TPP) ririmo kubera mu Mujyi wa Hanoi muri Vietnam kuva ku wa 24 kugeza ku wa 26 Kamena 2026.U Rwanda ruhagarariwe na Col Deo Mutabazi, Umujyanama mu bya Gisirikare muri Ambasade yarwo mu Muryango w’Abibumbye.
Yifatanyije n’abahagarariye ibihugu n’imiryango mpuzamahanga itandukanye mu biganiro bigamije kunoza imikorere y’inzego zoherezwa mu butumwa bwo kubungabunga amahoro bwa Loni na Afurika Yunze Ubumwe.
Abitabiriye iyi nama barimo kungurana ibitekerezo ku buryo bwo guteza imbere imikoranire, guhanga ibisubizo bishya ndetse no gushimangira ubufatanye hagati y’ibihugu n’imiryango ifasha ibikorwa byo kubungabunga amahoro.
Mu ngingo ziri kuganirwaho harimo uburyo bwo gukemura ibibazo bikigaragara mu kubaka ubushobozi bw’abakora ibikorwa byo kubungabunga amahoro, guteza imbere ibikorwa by’ubwubatsi n’ubuvuzi mu butumwa bw’amahoro, ndetse no kongerera ubushobozi inzego zishinzwe gukumira no guhangana n’ingaruka z’ibisasu n’ibindi bikoresho biturika bitegwa ahantu hatandukanye.
U Rwanda rusanzwe ruri mu bihugu bifite uruhare rugaragara mu butumwa bwa Loni bwo kubungabunga amahoro hirya no hino ku Isi, aho abasirikare, abapolisi n’inzobere zarwo bakomeje gutanga umusanzu mu kubungabunga umutekano no gufasha abaturage mu bice byugarijwe n’amakimbirane.
rwandatribune.rw
