Umugore w’imyaka 45 yishwe n’isasu ryayobye mu gihe imitwe yitwaje intwaro yo muri Sudani y’Epfo yarwanaga, mu gace ka Morobo gaherereye hafi y’umupaka wa Uganda.
Iyi mirwano yabaye mu gitondo cyo ku wa Kane, tariki ya 29 Ukwakira 2026, ihuza imitwe yitwaje intwaro ikekwa kuba ari iy’inyeshyamba zo muri Sudani y’Epfo.
Umuyobozi uhagarariye Guverinoma ya Uganda mu Karere ka Koboko, Hajji Marijani Wailaire, yatangaje ko abantu batatu bakomerekeye muri iyo mirwano, mu gihe undi muntu umwe yishwe n’isasu ryayobye.
Uwishwe ni Irena Roba Jeina, Umunya-Sudani y’Epfo w’imyaka 45 wari impunzi uba muri Uganda. Icyo gihe yari yerekeje muri Sudani y’Epfo mu bikorwa by’ubuhinzi, ariko agerwaho n’isasu ryaturutse aho imirwano yabereye.
Mu bakomeretse harimo Gabriel Rang w’imyaka 30, wavunitse bikomeye ukuguru, Tik Rial w’imyaka 40 wakomeretse mu kuboko, na Jehina Audi wavurirwaga ku kigo nderabuzima cya Busia muri Uganda.
Abayobozi ba Uganda batangaje ko bamwe mu bakomeretse bambutse umupaka bashaka ubuvuzi, bakaba barajyanywe ku bitaro bya Koboko no ku kigo nderabuzima cya Busia.
Nyuma y’iyo mirwano, abantu babiri batari mu bakomeretse batawe muri yombi.
Umuyobozi wa Koboko yavuze ko bazafasha inzego z’umutekano mu iperereza rigamije kumenya neza ibyabaye.
Yavuze kandi ko umutekano ku mupaka wa Uganda na Sudani y’Epfo ukomeje gutera impungenge, bitewe n’uko imirwano ibera hafi yawo ndetse n’amakuru y’amasasu akomeje kumvikana muri ako gace.
Yasabye abaturage ba Uganda kwirinda kujya muri Sudani y’Epfo mu bikorwa birimo ubuhinzi, gushaka amakara no kuragira amatungo, kugeza igihe umutekano uzaba umeze neza.
Inzego z’umutekano za Uganda zatangaje ko zongereye abasirikare n’abapolisi ku mupaka kugira ngo hirindwe ko imirwano yakwira ku butaka bwazo.
Rwandatribune.rw
