Perezida wa Repubulika Iharanira Demokarasi ya Congo, Félix Tshisekedi, yasabye u Burusiya gushyigikira ishyirwa mu bikorwa ry’imyanzuro y’Akanama ka Loni gashinzwe Umutekano isaba ko ingabo z’u Rwanda ziva ku butaka bwa RDC.
Ibi yabigarutseho ku wa 29 Ukwakira 2026, ubwo yitabiraga inama ya gatatu ihuza u Burusiya n’ibihugu bya Afurika (Russia-Africa Summit), yabereye i Moscow mu Burusiya.
Mu ijambo rye, Tshisekedi yasabye u Burusiya, nk’igihugu gifite uburenganzira bwo gufata ibyemezo mu Kanama ka Loni gashinzwe Umutekano, gushyigikira ishyirwa mu bikorwa ry’imyanzuro y’ako kanama n’imbaraga z’ubuhuza zigamije kugarura amahoro mu burasirazuba bwa RDC.
Yibanze ku myanzuro 2773 na 2808, avuga ko ikubiyemo ingamba zirimo guhagarika imirwano, gusaba umutwe wa M23 kuva mu bice ugenzura no guhagarika inkunga uwo mutwe ushinjwa guhabwa n’u Rwanda, ndetse no kuvana ingabo zarwo ku butaka bwa Congo.
Tshisekedi yanagarutse ku nshingano za RDC mu gushaka amahoro, ashimangira ko impande zose zigomba kubahiriza ibyo ziyemeje, harimo no guhagarika ubufasha buhabwa imitwe yitwaje intwaro no guhangana n’umutwe wa FDLR.
Yavuze kandi ko hakenewe kurindwa abasivili, koroherezwa ibikorwa by’ubutabazi no gufasha abavuye mu byabo n’impunzi gutaha ku bushake, mu mutekano no mu cyubahiro.
Iri jambo rya Tshisekedi rije mu gihe ibiganiro bigamije gukemura amakimbirane hagati ya RDC n’u Rwanda bikomeje kunyura mu nzira zirimo iza Washington na Doha.
Rwandatribune.rw
