Ubuyobozi bw’Umujyi wa Kigali bwafunze by’agateganyo inyubako eshanu nyuma yo gusanga zitujuje ibisabwa mu bijyanye no gukumira no kwirinda inkongi z’umuriro.
Inyubako zafatiwe iki cyemezo ziri mu bice bitandukanye by’Umujyi wa Kigali, zirimo Agakiriro ka Kabuga, Umukindo na Comejoga biherereye i Gisozi, ASMMS Ltd i Kicukiro ndetse n’Isoko rya Gahoromani.
Mu itangazo ryashyizwe ahagaragara kuri uyu wa Gatanu, Umujyi wa Kigali wavuze ko iki cyemezo cyafashwe mu rwego rwo kurinda ubuzima bw’abantu n’imitungo yabo, kuko kutubahiriza amabwiriza agenga umutekano mu nyubako bishobora guteza impanuka z’inkongi z’umuriro.
Ubuyobozi bw’Umujyi wa Kigali bwibukije ko kubahiriza amabwiriza yo kwirinda inkongi ari ingenzi, busaba ko ibikorwa byose bikorerwa mu nyubako byubahiriza ibisabwa mu rwego rwo gukumira impanuka zishobora guteza igihombo ku buzima bw’abantu n’imitungo.
Rwandatribune.rw
