Urukiko rw’Ubucuruzi rwa Kigali rwemeje ko ikirego cy’Ikinyamakuru Imena News Ltd cyareze Ishyaka Democratic Green Party of Rwanda gifite ishingiro, rutegeka iri shyaka kwishyura amafaranga arenga miliyoni 6.7 Frw akomoka ku bukode bw’imodoka zitishyuwe.
Ibi byemejwe kuri uyu wa 30 Ukwakira 2026, ubwo urubanza rufite inomero RS/SCPRCOM 00153/2026/TC rwasomwaga mu ruhame.
Uru rubanza rushingiye ku masezerano yo ku wa 12 Kamena 2024, aho Imena News Ltd na Green Party bumvikanye ku bukode bw’imodoka zirimo Coaster imwe na V8 imwe, ku mafaranga yose hamwe angana na 4.320.000 Frw.
Nyuma yo gusuzuma ikirego n’ibimenyetso byatanzwe n’impande zombi, urukiko rwemeje ko ikirego cya Imena News Ltd gifite ishingiro, rutegeka Green Party kwishyura amafaranga 4.320.000 Frw y’ubukode bw’izo modoka yari itarishyuwe.
Ku rundi ruhande, urukiko rwatesheje agaciro ikirego Green Party yari yatanze isaba kwishyurwa amafaranga 1.360.000 Frw yavugaga ko ari amafaranga y’ikirenga yishyuye Imena News Ltd, rutegeka ko icyo kirego nta shingiro gifite.
Uretse umwenda w’ubukode, Green Party yategetswe kwishyura inyungu z’amafaranga yari yaratinze kwishyura zingana na 1.626.767 Frw.
Urukiko rwategetse kandi iri shyaka kwishyura 100.000 Frw y’amagarama y’ikurikiranarubanza, 700.000 Frw y’igihembo cya avoka ndetse na 20.000 Frw yari ingwate y’amagarama yatanzwe na Imena News Ltd ubwo yatangaga ikirego.
Muri rusange, amafaranga yose Green Party yategetswe kwishyura Imena News Ltd angana na 6.766.767 Frw.
Uru rubanza rwari rushingiye ku makimbirane y’amasezerano y’ubucuruzi hagati y’impande zombi, aho Imena News Ltd yasabaga kwishyurwa amafaranga y’ubukode bw’imodoka ivuga ko itigeze yishyurwa, mu gihe Green Party yo yavugaga ko ahubwo yari yarishyuye amafaranga arenga ayo bumvikanyeho.
Rwandatribune.rw
