Imirwano ikomeye hagati y’abarwanyi ba AFC/M23 n’abarwanyi ba Wazalendo yabereye kuri uyu wa Gatandatu, tariki ya 8 Kanama 2026, mu mudugudu wa Misambo, muri groupement ya Kisimba, territoire ya Walikale, mu ntara ya Nord-Kivu.
Isoko ya Rwandatribune iri muri ako gace ivuga ko imirwano yatangiye mu gitondo, impande zombi zikoresha intwaro zoroheje n’iziremereye.
Abatangabuhanya bavuga abarwanyi ba AFC/M23 bagabye igitero ku birindiro bya Wazalendo muri Misambo.
Abantu bo muri ako gace bavuze ko imirwano yamaze igihe kinini,gusa nta rwego ruremeza ibyangijwe muri uko kurasana.
Abari ku ruhande rwa Wazalendo bavuga ko bashoboye gusubiza inyuma abarwanyi ba AFC/M23, bavuga ko abo barwanyi basubiye mu cyerekezo cya Rusamambu. Icyakora, ibyo birego ntibirabasha kwemezwa n’isoko ryigenga.
Kugeza ubu kandi, nta mibare yizewe y’abapfuye cyangwa abakomeretse muri iyi mirwano iratangazwa.
Walikale ikomeje kuba agace gashyamiranywamo
Imirwano yo muri Misambo ibaye mu gihe territoire ya Walikale imaze iminsi ivugwamo imirwano hagati ya AFC/M23 n’ingabo za Leta ya Congo zifatanyije na Wazalendo.
Ku wa 2 no ku wa 3 Kanama, imirwano yari yaravuzwe mu bice bya Ikobo na Kisimba, ndetse abaturage bagaragaza ubwoba no guhunga ingo zabo.
Radio Okapi nayo yari yatangaje ko nyuma y’iyo mirwano habayeho ituze ryoroshye ariko abaturage bakomeza kugira impungenge.
Ku wa 7 Kanama, andi makuru yavugaga ku mirwano yabereye i Rushihe, mbere y’uko imirwano yongera kubura i Misambo ku munsi wakurikiyeho.
abasesenguzi bavuvs ko nubwo bi bigaragara ko, hakomeje imbaraga za dipolomasi zigamije kugabanya umwuka w’imirwano mu burasirazuba bwa RDC, imirongo y’imirwano hagati ya AFC/M23 n’ingabo zishyigikiye Leta ya Kinshasa ikomeje kuba kwaduka.
Mwizerwa Ally
Rwandatribune.rw
