Kivu y’Amajyaruguru – Ihuriro AFC/M23 ryashinje Ingabo za Repubulika Iharanira Demokarasi ya Congo (FARDC), zifatanyije n’imitwe ibarizwa ku ruhande rwa leta, kugaba ibitero bishya mu ijoro ryo ku wa 29 rishyira ku wa 30 Kamena 2026 mu bice bya Mpati na Nyange-Bibwe muri Teritwari ya Masisi.
AFC/M23 ivuga ko ibyo bitero byibasiye cyane abasivili batuye muri Groupement ya Bashali Mukoto, aho hakoreshejwe imbunda ziremereye n’izoroheje, bikaba byaraviriyemo urupfu rw’umuntu umwe ndetse n’abandi barindwi bagakomereka. Abakomerekeye muri ibyo bitero bahise bajyanwa kuvurirwa ku Kigo Nderabuzima cya Mpati.
Uru ruhande rwanatangaje ko mu gitero cyabaye, abarwanyi bashinjwa kugaba ibyo bikorwa banasahuye imitungo y’abaturage, harimo amatungo arenga 80 y’ihene bivugwa ko yatwawe ku ngufu, ibintu AFC/M23 ivuga ko byongereye umwuka mubi mu baturage.
AFC/M23 yamaganye ibyo yise ibitero bigamije guhohotera abasivili, ishinja FARDC n’abafatanyabikorwa bayo kubigiramo uruhare, ndetse itangaza ko igiye gukaza ingamba z’umutekano mu duce igenzura hagamijwe kurinda abaturage n’ibyabo.
Ku rundi ruhande, iyi mvururu ikomeje gukurura amagambo hagati y’impande zihanganye mu burasirazuba bwa Congo, aho buri ruhande rushinja urundi kurenga ku masezerano adahuriweho yo guhagarika imirwano.
Mu minsi ishize, umutwe wa FDLR na wo wavuze ko wabonye ibitero ku birindiro byawo, ibintu AFC/M23 nayo ihakana, ivuga ko ahubwo ari yo ikomeje kugabwaho ibitero n’ingabo za leta n’abafatanyabikorwa bazo.
Intambara n’ukutizerana bikomeje gufata indi ntera mu burasirazuba bwa RDC, mu gihe amahanga akomeje gusaba ko habaho ibiganiro birambye byo kugarura amahoro.
Rwandatribune.rw
