Ingabo z’u Rwanda (RDF) zakiriye mu muryango wazo icyiciro gishya cy’abasirikare barangije amahugurwa y’ibanze ya gisirikare yamaze amezi atandatu, yabereye mu Kigo cy’Amahugurwa cya Gisirikare cya Nasho (Basic Military Training Centre) giherereye mu Karere ka Kirehe.
Igikorwa cyo gusoza ayo mahugurwa cyayobowe n’Umugaba Mukuru w’Ingabo z’u Rwanda, Gen Mubarakh Muganga, witabiriye umuhango ari kumwe n’abajenerali, ba ofisiye bakuru, aba ofisiye bato ndetse n’abasirikare bo mu nzego zitandukanye za RDF.
Mu rwego rwo kwerekana ibyo bungukiye mu mezi atandatu bamaze bahugurwa, aba basirikare bakoze imyiyereko itandukanye ya gisirikare, bagaragaza ubuhanga mu gukoresha intwaro, imyitozo y’urugamba n’andi masomo abafasha kuzuza inshingano zo kurinda ubusugire bw’igihugu n’umutekano w’abaturage.
Mu ijambo yagejeje ku barangije amahugurwa, Gen Mubarakh Muganga yabashimiye umurava, kwihangana n’ubwitange bagaragaje mu gihe cyose bari mu myitozo. Yabibukije ko kwinjira mu Ngabo z’u Rwanda bisobanuye kwakira inshingano zikomeye zo gukorera igihugu, abasaba gukomeza kurangwa n’imyitwarire myiza, disipulini n’indangagaciro ziranga RDF.
Yanabasabye gukoresha ubumenyi n’ubushobozi bungukiye muri ayo mahugurwa mu kurinda ubusugire bw’u Rwanda, kubungabunga amahoro n’umutekano, ndetse no kwitegura neza inshingano zitandukanye bashobora guhabwa, harimo n’izijyanye n’ibikorwa byo kubungabunga amahoro ku rwego mpuzamahanga.
Umuyobozi w’Ikigo cy’Amahugurwa cya Gisirikare cya Nasho yavuze ko amahugurwa yatanzwe yibanze ku kubaka abasirikare bafite ubushobozi bwo guhangana n’ibibazo by’umutekano bigezweho, harimo imyitozo y’imirwano, gukoresha intwaro, amayeri ya gisirikare, ubuzima bwo ku rugamba n’indangagaciro z’igisirikare cy’u Rwanda.
Aya mahugurwa ni kimwe mu bikorwa bihoraho bikorwa na RDF mu rwego rwo kongera ubushobozi bw’ingabo no gutegura abasirikare bafite ubumenyi, ubunyamwuga n’indangagaciro bibafasha gusohoza inshingano zo kurinda u Rwanda no kugira uruhare mu bikorwa byo kubungabunga amahoro haba mu gihugu no ku rwego mpuzamahanga.
RWARINDA Gaston
Rwandatrubune.rw
