Abayobozi b’ihuriro ry’abatavuga rumwe n’ubutegetsi bwa Repubulika Iharanira Demokarasi ya Congo rizwi nka Coalition Article 64, C64, bahuriye i Roma mu Butaliyani kuri uyu wa Mbere tariki ya 26 Ukwakira 2026.
Iyi nama ihurije hamwe abayobozi bakuru b’iri huriro mu gihe muri RDC hakomeje impaka zikomeye ku bibazo bya politiki n’umutekano, cyane cyane ibirebana n’imirwano iri mu burasirazuba bw’igihugu.
Mu bayobozi bari bateganyijwe muri iyi nama harimo Martin Fayulu, Delly Sesanga, Jean-Marc Kabund, Matata Ponyo na Moise Katumbi. Abagize iri huriro bari bamaze igihe bagaragaza ibitekerezo bitandukanye ku buryo ikibazo cya politiki n’umutekano mu gihugu cyakemuka.
Inama ya Roma igamije guhuza imyanya y’abagize C64 no kuganira ku cyerekezo cy’ihuriro mu gihe igihugu kiri mu bihe bikomeye bya politiki. Ni ibiganiro biteganyijwe gukorwaho mu rwego rw’uruzinduko abayobozi b’iri huriro bakorera mu bihugu bitandukanye by’u Burayi.
Ibibazo by’umutekano mu burasirazuba bwa RDC, inzira y’ibiganiro bya politiki ndetse n’uruhare rw’abatavuga rumwe n’ubutegetsi mu gushaka igisubizo ku bibazo by’igihugu biri mu ngingo ziri mu murongo w’ibiganiro byabo.
Iyi nama ibaye mu gihe impaka ku hazaza ha politiki ya RDC zikomeje kwiyongera, cyane cyane nyuma y’ivuka ry’umutwe wa Front pour la Refondation de la Nation, FRN, uyobowe n’uwahoze ari Perezida Joseph Kabila.
Abayobozi ba C64 bari basanzwe bagaragaza ko bifuza ko ibibazo bikomeye igihugu gihura na byo bikemurwa binyuze mu biganiro birimo impande zitandukanye.
BARAKA ESTHER
Rwandatribune.rw
