Perezida wa Uganda, Yoweri Kaguta Museveni, yakoze impinduka zikomeye mu buyobozi bw’inzego za Leta, asezerera mu mirimo abayobozi bakuru 11, ashyiraho abandi bashya 13, mu gihe abandi 27 bahinduriwe inshingano cyangwa bagumishwa mu myanya bari basanzweho.
Izi mpinduka zatangajwe ku wa Mbere, tariki ya 9 Ugushyingo 2026, zireba abayobozi bakuru bazwi nka Permanent Secretaries, bashinzwe gucunga imikorere ya Minisiteri n’izindi nzego za Leta.
Mu bayobozi 11 basezerewe harimo Pius Bigirimana wari Umunyamabanga Uhoraho muri Minisiteri y’Ubutabera, Adolf Mwesige Kasaija wari Umunyamabanga wa Inteko Ishinga Amategeko, Maj Gen David Kasura-Kyomukama wari muri Minisiteri y’Ubuhinzi, Dr Rose Nassali Lukwago na Bageya Waiswa.
Abandi basezerewe ni Alex B. Okello, Dorcus W. Okalany, Edith Nsaja Mwanje, Alfred O. Okidi, Dr John Geoffrey Mbabazi na Rose N. Kafeero.
Ku rundi ruhande, Museveni yashyizeho abayobozi bashya 13 mu myanya itandukanye. Muri bo harimo Charles Ssentongo wagizwe Umunyamabanga Uhoraho muri Minisiteri y’Ububanyi n’Amahanga, Edith Butuuro muri Minisiteri y’Ingabo n’Abahoze mu Gisirikare, Prof. Stephen Akandwanaho muri Minisiteri y’Ikoranabuhanga n’Itumanaho, na Barbara Namugambe muri Minisiteri y’Ubuhinzi.
Abandi bashyizwe mu myanya mishya barimo Kenneth Akiri muri Minisiteri y’Amazi n’Ibidukikije, Eng. Flavia Guto Bwire muri Minisiteri y’Ibikorwa Remezo n’Ubwikorezi, ndetse na Emmanuel Freddie Mugunga mu Biro bya Minisitiri w’Intebe.
Mu zindi mpinduka, abayobozi 11 bagumishijwe mu bakozi ba Leta ariko bimurirwa mu zindi nshingano. Harimo Doreen Silver Katusiime wimuriwe mu rwego rw’ubutabera, Dr Aminah Zawedde wagizwe umukozi mu Biro bya Minisitiri w’Intebe ushinzwe guhuza ibikorwa, na Rosette Byengoma wagizwe umujyanama mukuru wa Perezida mu bijyanye no kugura ibikoresho bya gisirikare.
Abandi bayobozi 16 bagumishijwe mu myanya bari basanzweho. Muri bo harimo Lucy Nakyobe Mbonye ukuriye abakozi ba Leta, Dr Ramathan Ggoobi ushinzwe imari ya Leta, na Dr Diana Atwiine uyobora imirimo y’ubuyobozi muri Minisiteri y’Ubuzima.
Ibiro bya Perezida wa Uganda byatangaje ko izi mpinduka zakozwe hakurikijwe ububasha Perezida ahabwa n’Itegeko Nshinga ry’icyo gihugu ryo mu 1995, hagamijwe kunoza imiyoborere no kongera imikorere myiza y’inzego za Leta.
Izi mpinduka zireba abayobozi 51, zigaragaza ivugurura rikomeye mu micungire y’inzego za Leta ya Uganda.