Ihuriro rya Sosiyete Sivile (Forces Vives) mu Ntara ya Kivu y’Amajyaruguru ryatangaje ko umutekano ukomeje kuzamba muri iyo ntara, rivuga ko umutwe wa ADF wakajije ibitero mu gace ka Beni, mu gihe na AFC/M23 ikomeje kongera ingabo n’ibikoresho bya gisirikare mu bice igenzura.
Ibi bikubiye mu itangazo ryasohotse nyuma y’inama yabereye i Mangina ku wa 21 Nyakanga 2026, ryagaragaje ko abaturage bo mu bice bya Mangina, Mbau na Oicha bakomeje kwibasirwa n’ibitero bya ADF birimo kwica abasivili, gutwika amazu no gushimuta abaturage.
Nk’uko iri huriro ribitangaza, nubwo abaturage bakomeje guha inzego z’umutekano amakuru ku rugendo rw’abarwanyi ba ADF, ngo kenshi izo mpuruza ntizitabwaho uko bikwiye, bigatuma uwo mutwe ukomeza kugaba ibitero ku baturage.
Sosiyete Sivile yanagaragaje impungenge ku mutekano wo mu bice byo mu majyepfo ya Kivu y’Amajyaruguru bigenzurwa na AFC/M23, ivuga ko uwo mutwe ukomeje kongera imbaraga za gisirikare ndetse n’ibikoresho ukoresha.
Iri huriro ryashinje AFC/M23 ibikorwa birimo kwica abaturage, iyicarubozo, gufata ku ngufu, gusahura umutungo kamere n’uw’abaturage, kwigarurira amazu n’imirima, kwinjiza urubyiruko mu gisirikare ku gahato no gushyiraho abantu batatoranyijwe n’abaturage mu nzego zimwe z’ubutegetsi.
Mu rwego rwo guhangana n’iki kibazo, Sosiyete Sivile yasabye Guverinoma ya Repubulika Iharanira Demokarasi ya Congo kongerera ubushobozi Ingabo za FARDC kugira ngo zirusheho guhangana na ADF, AFC/M23 n’indi mitwe yitwaje intwaro ikomeje guhungabanya umutekano.
Yanashimangiye ko hakenewe kongera ubufatanye hagati y’abaturage n’inzego z’umutekano kugira ngo amakuru atangwa ku gihe abyazwe umusaruro, bityo hakumirwe ibitero mbere y’uko biba.
Ku rwego mpuzamahanga, Sosiyete Sivile yasabye Umuryango w’Abibumbye n’abafatanyabikorwa ba RDC gushyira mu bikorwa imyanzuro yafashwe na Loni, gushyigikira ishyirwaho ry’urukiko mpuzamahanga rwihariye ruzaburanisha ibyaha byakorewe muri RDC, ndetse no gukomeza gushyigikira ishyirwa mu bikorwa ry’Amasezerano ya Washington agamije gushaka amahoro arambye mu burasirazuba bw’icyo gihugu.
Mwizerwa Ally
Rwandatribune.rw
