Raporo nshya y’ubutasi bwa Leta Zunze Ubumwe za Amerika igaragaza ko abayobozi b’u Burusiya bashobora kuba babona intambara hagati ya Amerika na Iran nk’amahirwe yo kongera igitutu kuri Washington no guteza imbere inyungu za Moscow mu bibazo by’umutekano mpuzamahanga.
Amakuru yatangajwe na The Washington Post avuga ko iri suzuma ry’ubutasi ryagejejwe ku bayobozi bakuru b’Abanyamerika mbere y’uruzinduko rwa John Ratcliffe, Umuyobozi w’Ikigo cy’Ubutasi cya Amerika (CIA), i Moscow.
Ratcliffe yari yagiye mu Burusiya mu rwego rwo kugirana ibiganiro n’abayobozi b’u Burusiya, mu gihe umubano hagati ya Washington na Moscow ukomeje kuba mubi, ahanini bitewe n’intambara ikomeje muri Ukraine.
Moscow ishobora kubona icyuho
Raporo y’ubutasi ivuga ko Kremlin ishobora kuba ibona ko uruhare rwa Amerika mu ntambara ya Iran rwakoresheje igice kinini cy’ubushobozi bwayo bwa gisirikare.
Ibi bishobora gutuma Moscow ibona umwanya wo kongera ibikorwa bya gisirikare muri Ukraine, cyangwa igashyira igitutu ku nyungu za Amerika n’ibihugu by’u Burayi.
Umwe mu bantu bafite amakuru kuri iri suzuma yavuze ko hari ababona ko abayobozi b’u Burusiya bashobora kuba barageze ku mwanzuro w’uko Amerika idashobora guhangana n’ibibazo bya gisirikare byinshi icyarimwe, cyane cyane mu gihe ikomeje gushyigikira Ukraine ndetse ikagira uruhare mu ntambara yo muri Iran.
Ratcliffe yaburiye Moscow
Mu biganiro yagiranye n’abayobozi b’u Burusiya, Ratcliffe na we ngo yaburiye Moscow ko kongera ibitero muri Ukraine bishobora kugira ingaruka zitandukanye n’izo u Burusiya bwaba bwiteze.
Yagaragaje ko ibikorwa nk’ibyo bishobora gutuma Perezida Donald Trump arushaho gushyigikira Ukraine, ndetse bikongera ubufatanye bwe na Perezida Volodymyr Zelensky.
Iri suzuma rije mu gihe uruhare rwa Amerika mu ntambara ya Iran rwashyize igitutu gikomeye ku bushobozi bw’ingabo zayo, cyane cyane ku bikoresho by’ingenzi bikoreshwa mu kurinda ikirere no mu bitero bya kure.
Nubwo raporo itavuga ko u Burusiya bwamaze gufata icyemezo cyo kongera ibikorwa bya gisirikare muri Ukraine, abayobozi b’Abanyamerika baracyakurikiranira hafi uburyo Moscow ishobora gukoresha umwanya uwo ari wo wose ibona nk’icyuho mu bikorwa bya gisirikare n’ububanyi n’amahanga bwa Washington.
Rwandatribune.rw
