Pasiteri Nzayitegaho Gédéon, Umunyamulenge uyobora Itorero Carmel rikorera ku Mutukura, yafashwe n’abakozi b’Urwego rw’Iperereza rw’u Burundi, SNR (Service National de Renseignement), ku wa 10 Nzeri 2026.
Amakuru avuga ko uyu mupasiteri yafatiwe ku rusengero asanzwe ayobora, ku Mutukura, 7ème Avenue, mu gihe yari imbere y’abanyeshengero.
Abakozi ba SNR bamufashe bamubwiye ko bamujyanye muri Documentation, ahazwi kuba hafi ya Cathédrale Regina Mundi i Bujumbura. Icyakora, ntibigeze batangaza impamvu y’ifatwa rye cyangwa ibyo yaba akekwaho.
Kuva yafatwa, abantu be bavuga ko batemerewe kongera kumusura. Bavuga ko kugeza ubu batamenya aho afungiye, uko amerewe cyangwa impamvu nyayo yatumye atabwa muri yombi.
Ifatwa rye rije rikurikira irya Nkunda Kilayi Jalos
Ifatwa rya Pasiteri Nzayitegaho rije nyuma y’ifatwa rya Nkunda Kilayi Jalos, na we Umunyamulenge, wafatiwe ku Kibuga Mpuzamahanga cy’Indege cya Bujumbura ku wa 8 Nzeri 2026.
Amakuru yaje kugaragaza ko Nkunda Kilayi Jalos na we ari umupasiteri, nubwo ibyo bitari byamenyekanye mu makuru ya mbere yatangajwe ku ifatwa rye.
Mu gihe gito, aba Banyamulenge bombi bafashwe n’inzego z’umutekano cyangwa z’iperereza mu Burundi, ibintu byateje impungenge mu bantu bo muri uwo muryango.
Nta mpamvu y’ifatwa iratangazwa
Kugeza ubu, nta tangazo rya SNR cyangwa irindi rwego rwa Leta y’u Burundi ryashyizwe ahagaragara risobanura impamvu Pasiteri Nzayitegaho Gédéon yafashwe.
Abantu be bakomeje gusaba ko bamenyeshwa aho ari n’impamvu afunzwe, mu gihe amakuru ku buzima bwe n’aho afungiye akomeje kuba make.
Iri fatwa kandi rije mu gihe hari impungenge zikomeje kugaragazwa n’abanyamulenge bamwe ku bijyanye n’ifatwa n’iperereza bikorerwa bamwe mu bagize uyu muryango baba mu Burundi.
Mwizerwa Ally
rwandatribune
