Amakuru akomeje guturuka mu misozi miremire ya Minembwe avuga ko Col. Ndabagaza, umwe mu bayobozi bakomeye b’umutwe wa MRDP-Twirwaneho, yaba yariciwe mu mirwano ikomeje kubera muri aka gace.
Ndabagaza ni izina ryagiye rigaragara mu makuru ajyanye n’imirwano yo mu bice bya Minembwe.
Raporo y’impuguke z’Umuryango w’Abibumbye yasohotse mu 2025 yamugaragaje nka Lt-Col. Oscar Ndabagaza, ivuga ko yayoboye itsinda ry’ingabo za AFC/M23 ryageze i Mikenge mu mpera za Kanama 2025.
Amakuru mashya ataremezwa ku mugaragaro avuga ko Col. Ndabagaza yaba yaraguye mu mirwano yo muri Minembwe.
Icyakora, kugeza ubu ntiharamenyekana neza aho yaba yariciwe, ndetse n’uruhande yari ahagarariye cyangwa yarwaniragaho muri iyo mirwano ntiruramenyekana neza.
Rwanda Tribune yashatse kumenya icyo uruhande rwa MRDP-Twirwaneho ruvuga kuri aya makuru, ndetse no kumenya niba rufite icyo rutangaza ku bivugwa ku rupfu rwa Col. Ndabagaza, ariko kugeza ubwo iyi nkuru yandikwaga, nta gisubizo cyari cyabonetse.
Kugeza ubu kandi, nta tangazo ryigenga cyangwa iry’inzego za gisirikare ryemeza ku mugaragaro ko Col. Ndabagaza yitabye Imana.
Rwanda Tribune ikomeje gukurikirana amakuru ajyanye n’iyi mirwano n’ibivugwa ku rupfu rwa Col. Ndabagaza, kugira ngo hamenyekane ukuri kwabyo.
Mwizerwa Ally
Rwandatribune.rw
