Mu gihe hashize igihe kitari gito, mu Ntara ya Kivu y’Amajyepfo muri Repubulika iharanira Demokarasi ya Congo hari imirwano ihanganishije MRDP -Twirwaneho n’ihuriro rihuriweho n’ingabo za Congo, u Burundi n’Imitwe bifatanya ya FDLR na Wazalendo.
Abasirikare badasanzwe bashiriweho guhangana na MRDP Twirwaneho bemeza ko ifatanije na M 23 bagaragaye mu myambaro idasanzwe benshi batabuze kugarukaho ku mbuga nkoranyambaga zabo nk’ibikabyo bikomeye byakoreshejwe na FARDC mu guhabya abo bahanganye.
Ubusanzwe aba basirikare babarizwa mu mutwe witwa Hiboux Special Forces, ukaba ukunze koherezwa aho rukomeye cyane cyane ku mirongo migari y’urugamba.
Isoko y’amakuru ya Rwandatribune iri i Minembwe Centre ivuga ko , iri tsinda ry’aba bakomando riri mu birometero 7 uvuye Minembwe Centre, aho riri kumwe n’ingabo za Congo, u Burundi n’imitwe ya FDLR n’aba Mai Mai.
Minembwe ifatwa nk’umurwa mukuru wa Teritwari ya Fizi, aho abaturage bahatuye bakunze kwibasirwa n’ibitero bya FARDC ibashinja gukingira ikibaba abarwanyi ba MRDP Twirwaneho na M 23.
