Imirwano ikomeye yabereye mu bice bya Mboko na Ng’ombe, hafi ya Kilembwe, mu Murenge wa Lulenge, Gurupoma ya Basimimbi muri Teritwari ya Fizi, kuva mu ijoro ryo ku Cyumweru tariki ya 27 Nzeri 2026, ikomeza ku wa Mbere tariki ya 28 Nzeri.
Amakuru aturuka muri ako gace avuga ko iyi mirwano yahuje abarwanyi ba AFC/M23 bafatanyije na Twirwaneho, n’ingabo za Repubulika Iharanira Demokarasi ya Congo (FARDC), Ingabo z’u Burundi (FDNB), Wazalendo ndetse n’abarwanyi ba FDLR.
Bivugwa ko abarwanyi ba AFC/M23 bateye banyuze ku muhanda wa Mboko–Ng’ombe, bagamije kugera ku birindiro by’imitwe yitwaje intwaro yari muri ako gace.
Mu mirwano, hibasiwe by’umwihariko ibirindiro by’abarwanyi bayoborwa na Komanda Nzabampemba, ukomoka mu Burundi, ndetse n’abarwanyi ba FDLR/Hamada bayoborwa na Komanda Théophile.
Amakuru yatangajwe na Tazama RDC avuga ko imirwano yabereye ku nzira ijya ahitwa Maléngé, hafi y’ahazwi nka Deux-Maisons, muri Gurupoma ya Basimimbi, mu gice cy’umudugudu wa Makembe/Babungwe, mu majyepfo y’Umurenge wa Lulenge.
Iyi mirwano yatangiye ku Cyumweru yakomeje ku munsi wose wo ku wa Mbere, bituma abaturage n’abarwanyi bamwe bava mu bice byari byibasiwe n’imirwano.
Bivugwa ko bamwe bahungiye muri Fizi-Centre, mu gihe abandi berekeje ahitwa Makembe.
Raporo zivuga kandi ko imirwano yo kuri iyi nzira yerekeza ku gice gihuza Fizi n’Intara ya Tanganyika muri Grand Katanga yatumye abarwanyi ba Wazalendo bari mu gace ka Misisi, kazwiho ubucukuzi bwa zahabu mu majyepfo ya Teritwari ya Fizi, bava muri ako gace bajya gushinga ibirindiro i Makembe, mu rwego rwo gukumira ko AFC/M23 yakomeza gutera yerekeza imbere.
Mu kindi gice cy’Umurenge wa Lulenge, ku muhanda wa Abangya–Kabanja, amakuru aturuka muri ako gace avuga ko hari abasirikare benshi b’u Burundi bagiye berekeza muri Fizi-Centre nyuma y’imirwano ikomeye bahuriyemo n’abarwanyi ba AFC/M23.
Kugeza ubu, nta mibare yizewe y’abaguye muri iyi mirwano cyangwa abakomeretse iratangazwa.
Nta ruhande muri ayo makuru ryari ryatangaje ku mugaragaro imibare y’abahitanywe n’imirwano cyangwa ibijyanye n’uko ibice byavuzwe byagenzwe.
Imyirondoro y’amakuru yo muri ako gace kandi iragorana, kuko hakomeje kuvugwa ko serivisi z’itumanaho na internet zahagaritswe muri Teritwari ya Fizi kuva ku wa 3 Nyakanga 2026, bikagora abaturage n’abakurikirana umutekano w’ako gace kubona amakuru yihuse kandi yigenga.
Rwandatribune.rw
