Umuyobozi w’Ubutumwa bw’Umuryango w’Abibumbye bwo kugarura amahoro muri Repubulika Iharanira Demokarasi ya Congo (MONUSCO), James Swan, yagiranye ibiganiro n’uwahoze ari Perezida w’iki gihugu, Joseph Kabila, n’abayobozi b’umutwe wa Front pour la Refondation de la Nation (FRN), baganira ku mutekano w’abaturage bo mu burasirazuba bw’iki gihugu.
James Swan yageze i Goma ku wa Mbere, tariki ya 2 Ugushyingo 2026, aho yari mu ruzinduko rw’akazi rugamije kuganira n’impande zitandukanye ku bibazo by’umutekano muke bikomeje kwibasira Uburasirazuba bwa RDC.
Ku wa Kabiri, tariki ya 3 Ugushyingo, yagiranye ibiganiro na Joseph Kabila, uyobora FRN, umutwe ubarizwamo bamwe mu bahoze mu ihuriro rya AFC/M23.
Muri iyo nama kandi hari Corneille Nangaa na Bertrand Bisimwa, bungirije Kabila mu buyobozi bw’uwo mutwe.
Ibi biganiro byabaye mu gihe MONUSCO ikomeje kugirana inama n’abayobozi ba AFC/M23, mu rwego rwo gushaka uburyo ikibazo cy’umutekano muke mu burasirazuba bwa RDC cyakemuka.
Ingingo zaganiriweho zirimo kurinda abasivili, korohereza ibikorwa by’ubutabazi no gufasha mu gukurikirana no kugenzura iyubahirizwa ry’agahenge mu burasirazuba bwa RDC.
MONUSCO ikomeje gushyigikira ibikorwa bigamije kugabanya umwuka mubi no guteza imbere amahoro muri aka karere, aho abaturage bakomeje kwibasirwa n’ingaruka z’amakimbirane yitwaje intwaro.
Rwandatribune.rw
