Umuhuzabikorwa wa AFC, Corneille Nangaa, yavuze ko kuba AFC/M23 itari gukomeza kwigarurira ibindi bice bigenzurwa na Leta ya Repubulika Iharanira Demokarasi ya Congo bidakwiye gufatwa nk’ikimenyetso cy’uko uyu mutwe watakaje ubushobozi bwa gisirikare.
Nangaa avuga ko AFC/M23 ahubwo yahisemo guha umwanya inzira ya politiki na dipolomasi, kugira ngo amakimbirane amaze igihe mu Burasirazuba bwa Congo abonerwe umuti urambye.
Ibi yabivuze ku wa 7 Ukwakira 2026, ubwo yasubizaga umunyamakuru wamubajije impamvu AFC/M23 itakomeje ibikorwa byo gufata ibindi bice.
Nangaa yavuze ko kuva M23 yari ikiri mu mashyamba ya Sabyinyo, ndetse na mbere y’uko ihinduka AFC/M23, yakomeje gusaba ibiganiro na Kinshasa, ariko ibyo yasabaga bikanga kwitabwaho.
Yagarutse ku rugendo rw’imirwano kuva i Rutshuru kugeza muri Kivu y’Amajyepfo, avuga ko buri gihe uyu mutwe wakomezaga gusaba ko ikibazo gikemurwa binyuze mu biganiro.
Nangaa kandi yagaragaje AFC/M23 nk’umufatanyabikorwa w’amahoro, avuga ko uyu mutwe wubahiriza ibyo wemeye, birimo n’agahenge kasinywe mu rwego rwo guha amahirwe ibiganiro bya politiki.
Yagize ati: “Turagira ngo tubwire Isi n’abanye-Congo bose muri rusange ko turi abafatanyabikorwa b’amahoro. Ibyo twiyemeje byose turabyubahiriza. Twasinye agahenge kandi turi kukubahiriza.”
Ku rundi ruhande, Nangaa yashinje Kinshasa gukomeza ibitero ku bice AFC/M23 igenzura, avuga ko harimo n’ibitero by’indege n’ibisasu bivugwa mu gace ka Minembwe.
Yavuze ko nubwo AFC/M23 ifite ubushobozi bwo gukomeza imirwano, idashaka ko intambara iba yo nzira yonyine yakemuramo ikibazo cya Congo.
Ati: “Twebwe twitwa inkazi. Dufite imbaraga. Twafashe Bunagana, Rutshuru ndetse tugera aho turi uyu munsi. Ariko dufite ubushake bwo kubona igisubizo cya politiki n’icya dipolomasi.”
Nubwo ashimangira ko bashaka amahoro, Nangaa yavuze ko AFC/M23 itazarebera igihe kirekire ibitero ikomeje kuvuga ko igabwaho.
Yatanze urugero ku bibera i Minembwe, avuga ko mu gihe ibitero byakomeza, ubuyobozi bw’uyu mutwe bushobora gufata icyemezo cyo kongera ibikorwa bya gisirikare.
Ati: “Nibakomeza ibyo bari gukorera Minembwe uyu munsi, ntabwo tuzabyihanganira. Hazagera igihe tubone amabwiriza yo kujyayo.”
Ibyo Nangaa yatangaje bishimangira ko AFC/M23 ivuga ko ikomeje gushyira imbere inzira y’ibiganiro, ariko ikanavuga ko ifite ubushobozi bwo gusubira ku rugamba mu gihe ibitero ku birindiro byayo byakomeza.
Rwandatribune.rw
